A Awl Lai Lo Timi Bia Hi BAWIPA nih A Duh Lo

A OL LAI LO KA TI I BAWIPA NIH A DUH LO, CU CAAH BAWIPA THAWNGIN A SI KHO LAI- Kum 7 ka si kum, 1982 kum ah, Rev. Van Hnuai Sum Crusade ka rak kai i, BAWIPA JESUH KHRIH zumhnak thawngin hrințhannak ka rak hmu. BAWIPA nih a ka umpi ti hi ka hmette i ka theih ko!

Malaysia ka um lio; Kum 2000 kum thar zan thokin, BAWIPA kan PATHIAN nih kan Miphun kongah aa tinhmi Vision hmuhter hram a ka thok i kum 2001 thawhțhan ni, April 15 ah THIANG THLARAU in Baptistma a ka pek! Cun, kum 2001, May 1 ah, “Na chim lai maw?” tiin BAWIPA nih a ka fial! Cun, BAWIPA nih a ka fial bantukin, kum 2001 May 4 in rianțuan hram cu kaa thok!

BAWIPA nih Kan miphun caah aa tinhmi a ka hmuhter hnuah, kan miphun kan tlau ning zong Vision in a ka hmuhter tikah, USA le ramthumnak lei lan kho ti loin, “BAWIPA kan ram ah ka kir ter ko, kan ram ah thlacam a herh tuknak kongtu hi ka va aupi ko lai,” tiah thla ka cam i kum 2002 ah Laitlang ah ka kir țhan.

Lairam ka kir hnuah, Tluang Za Uk Group hna sinah kaa fon i kum 2005 tiang an sinah ka um. Kum 2000 in 2005 tiangah, BAWIPA Vel le Zaangfahnak tampi ka hmu. Kan miphun kong a hung um dingmi Vision hna zong a ka pek chap lengmang. 2004 thokin Congthia tlang, ‘Horeb Tlang’ ah thlacamnak kan rak thok i kum fatin tein, nithum lengmang kan miphun caah rawlulh thlacam kan ngei tawn.

Kum 2008 fur lio ahkhan, Congthia tlang ‘Horeb Tlang’ ah thlacam dingin ka rak kal. Cu lio hrawng, Thantlang in Congthia, Zophei lam thluanpi cu khuaruahhar in a cet i a chia ko! A chia ti men khi a si lo, a chia hringhran ko! Congthia khua in thlacamnak tlang, ‘Horeb Tlang’ ka kai lai teah, “Hi lamin hmaanlung (Bus) a kal te ding cu a ol lo” tiah hawi theih hnganah ka chim ta i, cun, keimah te lawngin tlang kai cu kaa thawh.

Congthia in ‘Horeb Tlang’ cu cho lawngte meng 3 hrawng a si. Ka thlarau le thinlung cu tlangah a kai nain, ka taksa cu a bat ngai caah ka thadi colh lengmang i a kai ka kai kho lo. Tlawmpal ka kaiah kaa din, tlawmpal ka kaiah kaa din lengmang! Ka thlarau le thinlung nih ka taksa cu a hruai caah, ba lengmang le ner lengmangin tlangpar cu chuak lak ka kai kho ko! Tlang ka chuah bak cu a hlonh bak in kaa hei i hlonh ko! Cuti mitchinh pah i ka tluk lio ahcun, BAWIPA nih Vision a ka hmuhter diam ko!!!

A ka hmuhtermi cu, Congthia khua phak hlan deuh, tisik va cho ah hmaanlung (Bus) a kai cuahmah lio cu a ka hmuhter ko!!! Amen! Haleluia!!! BAWIPA Vel hi a va țha in a va ngan hringhran dah! Kha lio kan ram ralkap uknak le kan ram sifah harsatnak le furpi nawncek le lam chia zoh in lungdong aw in, “A ol lai lo,” tiah ka timi cu, BAWIPA nih a duh lo i, a si khawhning tu kha a ka hmuhter diam!!!

Nihin, kan miphun kong zongah; Thantlang in Congthia lampi, khuaruahhar in a rak chiat lio i, nawncek tam le lam chukcho tam le lam kual tam le, lam bingbo le lam kuar tam le, lam bit le lam har bantuk in, i lungrual lonak hna le, i lunghmuh lonak tete hna le, chambaunak hna le derthawmnak tete hna an hung tam tikah, lungdongh aw in, “A si kho lai lo, a ol lai lo, cutin, khatin kan si viarte lai,” tibantuk in a chim a holh mi le a țialmi kan um len hna.

Sihmanhselaw, BAWIPA thawngin a si kho lai! BAWIPA nih a kan tuahpiak lai! BAWIPA nih a kan teipiak lai! BAWIPA thawngin a si kho lai, tihi ka miphun sinah chim ka duh. BAWIPA nih, a THIANG THLARAU tampi in a kan toih te lai! Tlawmte lawng a si te lai lo!

Kan i rualrem lonak te hna le kan i hmuh thiam lonak te hna hi, kan hmuh ning a kum a no deuh rih caah a si ko. BAWIPA nih kan hmuh ning a kan țhanter lai, kan lung a var ter lai i kan i rualrem in kan i daw te ko hna lai. BAWIPA tu hi zum ko u law, i bochan ko u. Thlacam ngawl hna hlah u sih. BAWIPA thawngin kan tei lai! BAWIPA thawngin luatnak kan hmu lai! BAWIPA thawngin remdaihnak zong kan hmu lai! BAWIPA thawngin kan țhawng lai! BAWIPA thawngin kan fim lai! BAWIPA thawngin kan rum lai!

BAWIPA nih, David le Josep bantukin Thluachuah a kan pek lai. BAWIPA thawngin Kawlram le vawleicung ah Thawngțha kan aupi lai! Thawngțha kan karhter lai. KHRIH tehte kan si lai! Cucu BAWIPA nih pek a kan timhmi cu a si! Kum 2012 a si rua, cu ahcun, Congthia tiang lawng hmanh si loin, Zephai khua tiang bak, Hmaanlung (Bus) bakin kan rak phan hna! Atu ahcun furpi hmanhah, Thantlang, Congthia, Hnaring khua tiang in, khin, kal khawh dih a si cang! BAWIPA nih AMAH zumh khawhnak le bochan khawhnak THLARAU in pe ko hna seh. BAWIPA thawngin a si kho lai! KHRIH Lamkaltu Tluang Lian (Martar)

Author: admin