Atu Tan Raldohnak Ah Kan Fing Le Tlang, Horkung Sining Kan Theih Dih I, Hi Hi Kan Hman Thiam A Hau – CNA Ralkap Hlun Pu Zahung Mang

 CNA ralkap hlun Pu Zahung Mang nih tulio MAH ralhrang motor tamtuk in Chinram an rak kainak le Victoria Camp lak an itimhnak kongah zeitindah hriamtlai nih hmunhma la hna sehlaw a that hnga timi amah pumpak hmuhning le ruahnak a chimmi chung in a tawinak in kan langhter.

Kan vawlei, kan ram ah ralkap motor 50 leng a rak thlah tikah ka celh lo, ka thinhung tuk, ka lung fak tuk. Rawl ei zong ka zuam lo. Ral hi thlakhat ah voi li voi nga peng kan tu. Cu chung ahcun, kan tei caan hna a um I, kan tlik tak caan hna a um ve. CNA ah ka luh hnu cu ka nunnak hi ka miphun caah ka peek cang caah ka thih zongah ka miphun ca tiah ka ti I ka ttih zongah ka ttih lo zongah hmai ah ka ka nawr peng.

Ral kan tuk tikah lungfim tein kan tuk awk asi. Kan ti kan ram a si bantuk in fing le tlang, horkung sining kan theih dih I, hi hi kan hman thiam a hau. Ralkap cu an tamtuk asi ahcun kap duh hna hlah, hrial ko u. Zeicatiah ralkap cu pawcawmnak ah hriamtlaimi an si I, kan nih cu pawcawmnak ca si loin miphun le ram caah hriamtlak kan si. Mi pakhat nunnak hmanh asunglawi tuk.

Atu ah motor 50 in an rak kai I, hi hi a si khawh ahcun kah lo tein um a tha ko. Zeicatiah, kawl ralkap cu an thatlo tuk caah inn le lo an khangh dih ko lo. Bible ah kan hmuhmi bantuk in an tuh bantuk in an zun ko lai. Cun, mipi zong nih kawl ralkap hi itlaihter hrimhrim hna hlah u. Lam lak zongah zam ko u, himnak kawl ko u. Kawl ralkap cu an chiahru tuk hih. Meikangh a faktuk lio ah na chem ahcun a kang chin chin lai, meikangh a ciam deuh hnu ah cun fawi tein hmih khawh asi bantuk in kawl ralkap zong hi an linsat tuk lio caan ah kah ding an si lo.

An nih kawl ralkap cu EU ah an sung cang hi an aipuang, sahrang hliamhmi bantuk an si caah miseh lawng an bawh lio caan asi. Cu caah hrial ko u, kap duh hna hlah u. Amahbel an in doh hna ahcun, kap ko ulaw, hnu lei ah kirtak colh u. Mithalo hna cu anmah tein an thi thluahmah te ko lai. Hi hi ka siaherh tuk, ka thinhung tuk caah ka chimmi asi. Him khawh rak izuam cio ko u”.

 

Author: Main Editor

Leave a Reply

Your email address will not be published. Required fields are marked *