Bible Aa Tlaihmi Zumtu Ciocio, Pathian Atanhtu Ciocio Kan Hmuhning Aa Dang Hna

BIAKAM THAR LE RAM NGEI RALDOHNAK: Chin miphun zumtu hna nih, biakamthar hi pumpak zumtu nun le Khrihfa chungkhar nun le khrihfabu/Church tianglawngin kan rak i cawnpiak lengmang hna hna caah, nihin i kan ram buainak le ral i dohnak kongah, Bible aa tlaihmi zumtu ciocio, PATHIAN a țanhtu ciocio, rianțuantu ciocio kan hmuhning le ruahning a dang lengluang hna!

Zumtu pumpak nun le Khrihfa chungkhar nun le Khrihfabu nun caah le hmuh khawh lomi PATHIAN Pennak dirhnak caah, hriamtlai ralkap ngeih a herh bal lo i cu bantuk caahcun, dawtnak le intuarnak le ngaihthiamnak tu kha cawnpiak kan si. Sihmanhselaw, Biakamthar cawnpiaktu BAWIPA JESUH nihcun, biakamthar chan zongah, ramngei miphun hna cu ral an i do lainak kong kha a rak chim (Matthai 24:7, Luka 21:10-11).

Amah chan le a hnu chan i hriamtlai ralkap hna kha hriamtlai lo dingin a cawnpiak bal hna lo i a zultu Apostle hna zong nih an cawnpiak bal hna lo. Hriamtlai ralkap, Rom ralbawi pa cu, ahriam tlaih buin pei, a zumhnak ruangah “Abrahama le Isak le Jakob hna he pennak cabuai ah an țhu ti lai,” a ti kha (Matthai 8:11)!

Tipil petu Johan sinah, ralkap kha an ra i, “Kannih tah zeitin? Zeidah kan tuah awk cu a si ve lai?” tiah an ti. Annih cu a thawh hna i, “Ahohmanh hramhram in tangka va chut hna hlah u; va tlerhkhonh fawn hna hlah u. Nan lahkhahah khan nan lung va tling ko u,” tiah a ti hna (Luka 3:14). Hika i kan hmuhmi cu ralkap an țuan i hriamnam nan i tlaih hi a țha lo, tiah a ti hna lo. Hramhram i mi thil va chuh lo le va tlerkhonh lo le an lahkhahah lungtlin dingtu kha a rak chimh hna.

Luka 14:31-32 ah, BAWIPA JESUH nih, siangpahrang ralkap thong kul a ngeimi le ralkap thong hra a ngeimi i tuknak kong hna kha a chim! Biakamthar zumtu hna hi ram pakhat, cozah pakhat uknak chungah a ummi kan si dih hna. Ralpi pakhatnak le ralpi pahnihnak lio i a rak i domi ram mino hna kha, zumtu he zumlotu he hriam an rak tlai hna i ral an rak do cio hna.

Kha bantuk kha vawlei nih a chuahpi mi a si i kan duh in duh loin hrial khawh a si lo. Vawlei ah kan um ti hi kanmah nakin PATHIAN nih a kan hngalh deuh ko! Abraham nih a mah himnak caah a nupi Sarah cu ka far a ti te hna, David nih a himnak hnga aa hruhter te hna le tlangbawi lawng ei thiang, chang a ei i a mi hna zong a pek te hna kha, sualah relpiak an si lo.

Chinmi Khrihfa kan si khawhnak caah, PATHIAN nih a hun thlah i a hun hmanmi hna ram cu USA a si. USA ram cu zumtu țha BAWIPA PATHIAN a țanhtu hna nih an hriam le namin an tlakmi le sermi ram a si. Zumtu an si caah, ral do loin um hna selaw, red indian le an ral hna nih an rak nawn dih hna lai i Carson te nuva zong Chinram, kan ram ahhin an rak ra kho ve hnga lo i thawngțha tuanah kan thei kho hna hnga lo. khuachia biaknak a siloah, biaknak dangdang hna tu ah kan lo tlau ko hnga!

A ram le a miphun caah hriamtlai ralbawi, rom ralbawi pa cu hriamtlai ralkap a si bu khan PATHIAN zaangfahnak kha zeitluk indah a hmuh kha kan hmuh! Cucaah, ram ngei miphun kan si nakin, na ram le na miphun khamh awk le ven awk caah na cawlcangh ruang ah an in mawhchiat ahcun, rom ralbawi pa kha va philh hlah u! BAWIPA kha zum ulaw, an mawhchiattu hna nakin vancungah dirhmun sang Thluachuah co deuh ko u. KHRIH Lamkaltu Tluang Lian (Martar)

Author: admin