CDF-KKG nih Bochan Bakmi Salai Thawng Lian nih Miphun Caah Nunnak A Peek

CDF Ralkap Salai Thawng Lian Uk a Nunnak a Liam. CDF-KKG ralkap bu no. 4 ah ralkap pakhat a simi Salai Thawng Lian Uk (23) cu ralram hmun khat ah ram le miphun ca ah a nunnak a pek, tiah CDF-KKG nih tu zaan ah thawng an chuah. “Salai Thawng Lian Uk nih nunnak pek tiang in ram le miphun ca ah ral a dohmi cung ah upatnak kan pek i taantakmi chungkhar kan ngaihchiatpi hna,” tiah CDF-KKG nih upat peknak le ngaihchiatpinak an langhter.

Biak Lian Thawng– Lihchim (Pathian Nih A Huat Bikmi Thil)- Minung hi lih a chim bak lomi kan um lai lo. Minung cu kan chuahka in kan thih tiangah lihchim a hmangmi lawng te kan si. Ka chuahka in nihin ni tiangah lih ka chim ballo a timi cu a lih a si i lih a chim si. Pathian nih hin a huatmi thil hi tam tuk hringhran a um ko lai. Hi chungah a huat bikmi cu “Lihchim” (lie) hi a si. Zeicahtiah “Pathian cu Biatak a si caah a si. A lam le a biakhiahnak cu a ding. Zumhawktlak a si. Hlen a hmang lomi Pathian a si. Cu Pathian nih a huat bikmi cu, “Lihchim” a si.

Atu Myanmar ram a buai lioah ralhrang ralkap an tuahsernak kong thawngfianhnak a tuah paoh ah lih a chim bikmi le lih fangfak bak a chimmi cu Zaw Mee Lung tiah auhmi Zaw Min Htoon a si men lai. Cu Zaw Min Htoon nak hmanh in lih a chim deuhmi le lih thawngpang a țial i a thlah deuhmi cu lai media an si ko lai dah ka ti. Phun dang in chim ahcun atu lio ah lih a chim bikmi le lih ca a țial bikmi cu lai media an si lai.

Lihchim timi cu zeidah a si?- Lihchim timi cu “a dik lomi thil, a dik in chim; a si lomi thil a simi in chim; thil a sining in chim loin, a si lo ningin chim le a taktak a si lomi thil a tak in chim khi an si.” Phun dang in chim ahcun zei thil kong paoh ah “biatak” chim lo khi a si. Lih le biatak hi aa ralkahmi an si. Cucaah zei bantuk bia paoh va si ko seh, biatak kan chim lo paoh ahcun lihchim a si. Kan si lo ning piin biachim zong khi, lih a si. Lih hi a phun a tam tuk. Biatak le biadik chim lo paoh, lih a si ko.

Lihchim hi “hlen” (deception) a si. Thil a sining taktak kha, thuh duh tik le langhter duh lo tikah, bia kha a vel in vel i, mi thinlung ah “a kan hlen” ti hngalh lo awkin, thil a si lomi kha a si bantuk in va chim zong khi, “lihchim” a si. Mi nih a hmaan lomi thil zong a hmaan bantuk in an zumhnak dingin chimmi paoh cu lih a si. Biatak le biadik kha a si lo ning in chim asiloah langhter asiloah fianter asiloah a si taktak lomi kha a si bantuk in langhter kha a si.

Lih hi a phun a tam tuk caah, chim cawk ding a si lo. Lih zong hi a tam tuk fawn caah, minung nih hin “lih ka chim bak lo” a timi cu lih a chim tu a si” tiah psychologist pawl nih an ti. Lihchim loin minung hi an um kho lo ti a si. Cucaah “lihchim cu sualnak ngan bik pakhat a si caah, hell kal viar ding kan si. Cucaah Jesuh Khrih zong vawlei ah a ratnak le kan caah a thihnak hi a si.”

Lihchimmi hna ziaza le lungput- Lihchim hmangmi hna hi, lihchim hmang lomi hna he an sining aa dang. An lungput zong aa dang. An khuaruahmi, thil an hmuhning le an nunning zong aa dang. Lihchimmi hna ziaza le lungput cu, a tanglei bantuk in a si tiah minung kong thiammi hna nih an ti.

  • 1. Lih an chim tikah a poi ah an ruat lo.
  • 2. Lih an chimmi hi lihchim ah an ruat lo. A ruang cu an chim tawnmi a si ruangah a si.
  • 3. Lih an chimmi kha voi tam tuk an chim tik ahcun an mah lila nih an i zumh le a taktak ah an ruah.
  • 4. Lih an chimmi kha a voi a tam tuk tik ahcun lih ka chim timi an ruat ti lo. Biatak ah an ruah.
  • 5. Lihchim hmangmi cu zei bantuk lih an chim zong ah, midang teinak a si poh ahcun a poi an ti lo.
  • 6. Midang teinak a si paoh ahcun lihchim kha a pawi an ti lo.
  • 7. Lih chimmi cu anmah lam awnnak ca lawng an chimrel peng.
  • 8. Lih a chimmi cu bia hi a lutaw le a hnuhmai an ruat lo. Bia hi an merh peng. An thlen peng.
  • 9. Lih a chimmi cu lih an chim than lengmang. Lihchim loin an um kho ti lo.
  • 10. Lih a chimmi cu zeitikhmanh ah biatak chim an i harh. Biatak chim he an i ral.

Minung a simi paoh hi, chuahka in thih tiang ah, lihchim lomi kan um lai lo. “Cucaah lih chim hi minung sining pakhat a rak si ko. Miphun kip nih lih an chim cio. Nunphung kip ah lihchim a um. Lihchim lomi miphun an um lo. Cucaah lihchim hi, minung nih nu hrinnak in chuahpimi ziaza pakhat a si. Cucaah, Hindu zong nih lih an chim caan a um i, Khrihfa, Muslim, Buddhist, Judaism le a dang biaknak zong nih lih an chim cio ko, Cun a dang biaknak a biami pawl zong nih chim țhiamțhiam a si.

Cucaah zei bantuk minung paoh nih hin, lih an chim dih ti a si. Cu chungah, doctors, nurses, ralkap, palik, sianginn saya/sayama, politicians, pastor, evangelist, lentecelhmi le hlasak thiam, TV ah a larmi ngaknu tlangval le chawlet-chawhrawl vialte an i tel dih ti a si. Hi lakah a ding bikmi bu cu, “Medical lei rianțuanmi hi an si” tiah an ti. A changtu ah “lentecelhmi an si” tiah an ti.

Lih a chimmi Hna- Mifim cu an fim tuk caah an chimmi hi lih a si le si lo theih khawh a si lo an ti. Cun mifim cu, mi an hlen tik hna ah, thuk tuk le zapi zaran nih lih an chim le chimlo theih khawh a si lo. Hitler nih a rak timi cu, “Mi na hlen vaivek a si ahcun fak taktak in va hleng hna” tiah a ti. Cucaah Russia zong a hlen; UK zong a hlen. Austria zong a hlen. Tuklonak ding, ram khat le ram khat i tu lo dingin biahrennak a tuahpi hna le a donghnak ahcun a hlen dih hna. Cucaah Ralpi II nak tiang a chuak. Mipi million 55 thihnak le ralkap million 25 thihnak a chuak. Cucu Hitler nih lih a chimmi nih a chuahpimi thihlohnak a si. Lih hi țih a nung taktak.

Zei bantuk minung paoh nih hin, lih hi a phunphun an chim. A din deuh le fak deuh, a tlawm deuh le a tam deuh lawng an si. Chimmi lih nih midang caah harnak le chiatnak chuahpi mi lih a um i, lih a si ko zong ah mi caah chiatnak a chuahpi lo tu lih a um ve. Zeihmanh va si sehlaw, lih cu lih a si ko. Vawleicung minung sining zoh tikah, lih hi an chim cio tawn ti a si. Cucaah Mirang phungthluk ah, “Lih chim lo cun, bia siam a tling lo” an ti phah ti a si. Zei bantuk minung dah lih a chim lo bik mi an si?” timi an hlathlai i, “Lentecelh a huammi hi, lih an chim lo bik” ti a si. Cun doctors le nurse tibanbtuk, sizung riantuanmi hi lih an chim lo bik ti a si.

Lih a chim bikmi hi zeidah an si timi an zoh i, pakhatnak ah sihni an si; pahnihnak ah politician le pathumnak ah chawlet-chawhrawl an si ti a si. Sihni cu upadi an thiam; an bawmhmi hna kha a sual zong ah a sualnak thuhpiak an i zuam. Biatak chimnak in, teinak tu kha biapi ah an chiah deuh ti a si. Sihni hi a thiam tuk ahcun, a sualmi le mithat lainawng zong kha, an luatter ko hna. An sual lonak an dirpi khawh; tehte an langhter khawh ahcun an luat ko ti a si. A suallomi zong sual an puh khawh hna i, a sualmi zong kha thiam an coh khawh hna ti a si. “A sualmi sual phawt loin, a suallomi sual phawt hi, bible nih a huat taktakmi a si”

Predident Bush nih khan Iraq dohnak kong ah, lih hi voi 1,234 a rak chim ti a si. A hmanlomi bia voi tam tuk a chim ti a si. Washington Post nih an tialmi ah, President Trump nih hin kum thum chung ah, “false asioah misleading claims” (Aa palhmi asiloah a hmanlomi) voi 16,241 a chim ti a si (January 20, 2020 Washington Post). Ni 1,170 chung ah voi 18,000 a chim ti a si (April 14, 2020). Zeicatiah ruat suksak loin, a duh paoh a chim tik ahcun, “A diklomi le hman lo mi a rak chim lengmang” ti a si. Hi bantuk hruaitu ropui taktakmi hmanh nih lih an chim ko ahcun midang nih cun chim lo awk hi a țha ti lo.

Kawl ralkap le ralbawi pawl hna hi, lih zei tluk tam dah an chim hnga timi hi, rel cawk ding zong a si lai lo. An chimmi hrimhrim hi, a dikmi a um ballo. Kawlram Prime Minister hmasa bik U Nu te hna hi pura sak le pura tang thlacam cu an cak ngang nain an nunnak ah biatak an rak chim lo. General Ne Win te hna zong an si ko. Kawl ram bawi a tam deuh cu, an tuahmi le chimmi aa khat ballo. Cucu an zia a si caah, a phungah an ruah ko. An chim pengmi a si ko caah a phungah an ruah ko.

Nai te ah, “21st Century Panlong Conference” an rak tuahmi zong kha a lengphaw cu a țha ngai, nain a chungah cun “hlennak” a um khomi a si. A ruang cu, “Tlangcungmi duhmi an theih tuk. An fiang tuk. Kan ram kuaimantertu zong a si lai lo timi an fiang ko nain, a chungmuru taktak ah a kan luhpi duh lo. A vel in an vel peng. Kum tampi kal i, vuai cikcek in tuahpi i, a donghnak ah, ‘Cepa na duh le cepa, Varit na duh le Cepa” timi phun ah aa thawn khomi conference a si. Ralrin a hau. Daw Aung San Suu Kyi zong khi a hmurka cun bia dah dawh a chim ko, nain lih a chimmi tam pi lai, biatak a chim hnga dek maw timi ruah a herh.

Cucaah Kawl ram ralkap le ram hruaitu hna hi, Gen. Ne Win chan 1962 in nihin ni tiang lih an chim peng ko. Cucaah lichim kha an zia ah a tla cang. An zia ah a tlak hnu cu lih chim kha a pawi ah an ruat ti lo. An chim hmun kha a si ko caah an chim peng ko. Cucaah Tlangcungmi hi an kan hlen chukcho peng i, nihin ni tiang zong daihnak le remnak a um khawh lonak taktak cu, “biatak chim le tuah um loin, lin in i hlenthawi ruangah a si peng ko.”

Hi bantuk in, kan ram hi biatak chim loin lihchim le lih in rianțuan a tam tuk ruangah, vawleicung ah a ding lo (corrupt) bikmi ram palinak ah a um. Amah nakin a ding lo deuhmi ram hna cu Columbia, Mexico le Ghana lawng an si. Hihi ruah ah ningzak taktak khi kan si. Hi ruangah kan ram zong a țhancho khawh lonak a si ko. Kan phunghrampi (Constitution) zong a ding lo. Kan ram upadi zong a dinglomi a tam tuk. Cucaah kan ram hruainak zong a ding lo i sifak bik le “corrupt” bik ram ah kan i telnak a si ko.

Fian a herhmi cu hihi a si. Lih cu a ho nih chim zong ah lih a si ko. Zei bantuk hruaitu le zei bantuk party nih an chim zong ah lih a si ko. Lih ah cun miphun zong a um lo. A chimtu paoh kha lihchim kan si ko. Khrifah le Buddhist le Muslim le Hindu timi a um lo. Pathian a zummi le zumlomi timi zong a um lo. Lih cu a ho nih kan chim zong ah lih an si ko. Biatak an si ballo. Aho nih kan chim zongah Bawipa nih a huat.

Lih aa thawknak hrampi khoika in dah a si?- Pathian cu “Biatak” a si i, “biatak chim” a duhmi a si. Biatak chim a kan fialmi a si. A fapa Jesuh zong “Biatak” a si ve (John 14:6). Lih cu a hmun lo. Biatak cu a hmun zungzal. Aa thleng kho lo. Cucaah Jesuh cu biatak a si caah, “Jesuh Khrih cu nizan, nihin le zungzal in amah ning a si ko” (Hebrew 13:8). Pathian le Jesuh an i khatnak cu, “lihchim” a huami an si. Zeicahdah lihchim an huat timi hi a ruag a um.

Pathian nih lihchim a huat. Titer a huat. Lengphaw thil a huat. Jesuh zong nih a Pa huatmi paoh cu a huat ve. Cucaah bia a chim fate a nolh lengmangmi cu, “Biatak kan chimh hna” a ti lengmang khi a si. Biatak chimtu Jesuh nih, Judahmi hi lihchim țhatnak kaa khat hmanh a cawnpiak bal hna lo. Cucaah, Jesuh Khrih nih “Amah a zummi Judahmi pawl kha, lihchim kong ah hitihin a rak cawnpiak hna.

Nan nih cu nan pa khuachia fa kha nan si i, tuah nan duhmi cu nan pa khuachia duhnak kha a si. Amah cu a hramthawk tein lainawng a rak si. Biatak kha zeitik hmanh ah a țanh bal lo, zeicatiah a chungah biatak zeihmanh a um lo. Lih a chim tikah a tuah tawn zungzalmi kha a tuah a si ko, zeicatiah a nih cu milihchim a si i lih vialte pa a si” (John 8:44-45).

Lihchim hi aa thawknak a um. Lih kan chim tikah nangmah le keimah nih kan chim, kan thawk ti awk a si lo. Aa thawknak a um. Cu aa thawknak cu “lih vialte hna pa” sin in a si. Cu pa cu, Jesuh nih cun “milihchim” tiah a ti. Cu pa cu aho dah a si? “Khuachia” (Satan) kha a si ko. Cucaah mi zeipaoh nih lih kan chim ahcun, kan pa cu, “khuachia” kha a si ko.

Pastor zong “lih” nan chim tikah nan pa cu khuachia a si ve ko. Bible kong lihchim zong a ngah lo i, Pathian bia zong lih in chim a ngah lo. Kan chimmi kha, hlennak le lih in chim a si ahcun, “khuachia fa” kan si ve țhiamțhiam. Cucaah lihchim le a diklomi chim hi kan i ralrin taktak a herh. Zeicahtiah lihchim cu Pathian nih a huat bikmi a si. Chirhchan: Semnak lairam Dinnak kha a cat lomi tiva bantukin luanter camcin ko u (Amos 5:24).

Author: admin