Coronavirus (Covid-19) Kong Ah Hngalh A Herhmi Tete

Atu lio cu nan theih cio bantukin ram kip le hmun kip ah Coronavirus (Covid-19) a voihnihnak a chuah țhan hnu in a dai kho rih lo. Covid tilet a thawh cuahmah lio a si. Mikip thinlung a laak lio le a cawlcangh lio pi a si. A bik in Myanmar ram cu ral le rai karah um a si fawn i ralrin a herh khun. Cu hmanh ah cun Chin ram ah i ralrin khun ding a si. A ruang cu ralzam in hmun kipah i țhekdarh lio caan a si i a bubu in umhmun khuar lio caan a si.

Cucaah, cucaah cun zeitindah kan țhutdirning le kan i kilvenning a si kun ne lai? A tanglei ah zeitindah kan țhutdirning le kan i kilvenning a si lai ti cu kan zoh tuah hna lai mu. Coronavirus zawtnak a langhning cu a din ngaingai kan ti khawh. Mi cheu cu an zeihmanh a ti lo, an zaw lo nain an i chek tikah zawtnak hrik a ngeimi (Positive) zong an um ve țhiamțhiam fawn.

A bikin kumkhua upa cangmi tar deuh le mi damlo ciami hna tu cu fak piin an zaw kho i an tuar deuh ngai. Thisa hna a țhat lio ahcun zawtnak i hngalh a fawi lo i kan zaw rua lo kan ti lio ah midang kha chawnh an rak si diam cang. Cucaah zapi lakah zawtnak a karh chin lo nakhnga kan dihlak in ahopaoh kan i bawmh cio ding kha a biapi tuk hringhran.

Midang he zawtnak i chonh lo nakding ahcun: Hawi he i hlatnak ah um law mibu sin umkal kha hrial i zuam. Na dam satsai lo ahcun inn ah um ziar ko. Lunghrinh ruangah hrenmi asiloah nangmah te lawngin umtermi na si ahcun leng chuak bak hlah. Midang he miter pakhat tal cu i hlat dingin um.

Thianghlim tein um ding. Leng na chuah tik le hawi sin na kal tikah na kut i țawl lengmang. Na hmur i hup peng. Inn na lawi tik zongah na kut i țawl lengmang kha philh hlah. Zunput na kal tikah na kut i țawl lengmang. Na khuh na khuh ah siseh, na hathio tikah siseh, na hnap na hnit tikah siseh catlap, țitsu in i hup law a dih in hlonh colh. Cun na kut i țawl colh. Hnawhnak catlap, țitsu na ngeih lo ahcun na kiu karlak na kut na bilnak ah na hathio, na khuh khuh.

Nawlngeitu cozah leiin siseh, covid committee leiin siseh coronavirus kongah a biapimi ruahnak an chuahmi le zulh ding tiah an timi paoh kha zulh khawh i zuam. Cun zawtnak kong le thil sining zohchih in ruahnak an chuahmi le zulh ding phung sermi aa thlen țhan khawh lengmang ruangah thawngpang thar ngaih khawh peng i zuam. A si khawh ahcun inn te ah um khawh i zuam hna u sih. A herh tuk lomi ah hawi he i tonnak sawhsawh ngeih le mibu sin um cu hrial kho hna u sih law kan him ko lai.

Author: Main Editor

Leave a Reply

Your email address will not be published. Required fields are marked *