Dr.Sasa Chunmang/Vision Hi Pathian Nih Atak In Tlinter Hram ko Seh

Dr.Sasa chunmang le vision vialte cu ralhrang ruangah zeikodah a lawh te hnga. Pathian nih Chinram le Kawlram pumpi caah a hman cuahmah lio ah rampi cu ralhrang uknak tangah a um than ai. Dr.Sasa nih tuan deuh ah achunmang arak chimmi update kan tuah than.

“Doctor Sasa CHUNMANG (vision)Laitlang hi kawlramchungah siizung thabik umnak siter hi a si. Cu atlin khawhnak ding caah biatak tein UK ram siizung le midical colleges tampi he pehtlaihnak ka tuah cang hna. Cu lawng si loin USĀ  ramchung medical college le university he riantuantinak ngei dingin chim relnak ka ngei cang fawn.

Nihin ah US nih anmah he riantuanti dingin akan sawm thluahmah ve cang. Laitlang ah mobile phone hmangin ultrasound lak khawhnak dingin timhtuah cuahmah a si. Cu mobile phone nih cun kan damlonak cu atheih khawh cang lai. Cu tikah kan umnak khua cio ah drone nih sii a kan pek cang lai. Mah kong cu America khualipi Washington DC ah ka chim tikah American cozah nih a uar tuk.

Nihin ah ka chunmang pakhat a um rihmi cu Chinram cu kawlramchung fimcawnnak thabik hmun siter hi asi. Cutikah cun Rangon, Mandalay mi vialte hna cu Chinram ah sianginn kai ah an rak ra cang lai. Cu ka chunmang cu tlam atlin ah cun kan Chinram chungah hin college tha le university tha bik bik a um cang lai. Cutikah cun kan Chinram ah kan cawn dingmi cu Chin ca le holh a si lai.

Kawlmi zong nih Chin ca le holh an cawng ve cang lai. Kanmah ca le holh in ca kan cawn khawh caan a phanh tikah cun kan Chinram common langue cu minrang holh English a si cang lai. Cubantuk caan kan phanh tikah cun Chin miphun chungin mifim cathiam (Scientist, doctors,engineers le uktu bawi tbk) tamtuk kan chuak cang lai. Cu cu nihin i American colleges le university kip ah ka chim lengmang mi cu a si. American colleges le universiy nih cun mah idea hi an uar tuk hna.

Atu hi Lailenpi ah vanlawng tumnak hmun kan ser. Keimah nih chunmang ka manh rihmi cu, Lailenpi lawng siloin kan Chinram ah hin vanlawng tumnak hmun 6 serthan ding hi asi. Cu saduhthah chunmang atlin khawh ah cun Kawlramchungah Chinram cu athangchobik a si cang lai. Kan herhmi thil kongah kawlram kan panh ti lai lo. Fimcawnnak ruahah Rangon kan kal ti lai lo i, damlo ruangah kawlram Rangon kan panh ti lai lo. Zeicatiah Chinram cu kawlram nakin zeizong vialte kongah atha deuh cang lai.

Pathian khuakhan hi aho nih dah atheih khawh, nan tefa fanu fapa hna lakah ahodah mi lianngan achuak lai lo ti achim khawh, cu caah cu pakhatnak ah Pathian ibochan ko u. Jesuh nih khuaruahharnak atuahnak hmun hna cu tlangcung ah an si hna. Tlangcung asimi Chinram zongah Pathian nih khuaruahharnak atuah hrimlai hi ka zumh. Atu hi atuah cuahmah cang. Nihin i ka chunmang cu vawleicung ram kip nih hmailei ah cun Chinram ah an rak ra lai i Pathian an thangthat te lai timi hi ka vision in ka hmuhmi a si.

Kan khualipi Hakha nih puicimh zatlaknak a rak tonah khan keimah pumpak in Hakha cu ka phan ve. Ramdang bawmhnak in facang tun zeimawzat ka rak phor. Cu lio ah mipi hmaiah ka chimmi bia cu Kan khualipi Hakha hi kan remh than lai, Hakha cu voi 7 rawh zongah kan remh than lai tiah ka rak chim. Caan tlawmpal ah ka riantuanmi dohtu tampi online in an um. Mah hna nih khan Hakha mipi caah facang 1kg tal an chuahpi maw. Cu caah nihin i ka dirhmun hi ka philhlo.

Zeiruangah dah Pathian nih Armenia ramah a ka kal ter timi hi ka philh lo. Ka miphun caah a si. World Bank President ka ton hnu ah a tu cu World bank nih US $ 80 million dihin Kalaymyo – Hakha karlak motor lam remh dingin min athut cang. Kan fale sianginn kaimi tangkhat -tangriat hngakchia hna cu bawmhnak stiphen thlakhat ah Ks 5000 cio thla chiar apek hna lai. Chinram elctricity caah US $ 500 million apek lai, fimcawnnak caah US $500 apek rih lai. Cu hnu ah ral ruangah miphun harnak atongmi tlangcungmi sinah US $ 200 million pek rih lai tiah a ti.

Pathian sinah thlacamnak in rak ka bawm peng ko u. Laitlang hi fimcawnnak siseh, damlo zohkhenhnak kongah siseh, mi vialte nih thluachuah an hmuhnak hmun ah asi khawhnak ding hi ka chunmang a si. Pathian hi pakhatnak ah chia ulaw, nanmah kha pahnihnak si ulaw, vawlei hi pathumnak lawng ah chia u. Cuticun Chinmiphun cu tiva bantukin luang hna u sihlaw midang caah theitlaitha atlaimi thingkung bantuk si izuam hna u sih.

Ka riantuanmi kongah criticise tampi a um ah hin minung sinak leiin a chelah cun faktukin ka tuar ve nain ka tuanmi hi Chinram le miphun caah asi ti hi ka philh lo. Chinram cu sifakbik si ko hmanhsehlaw Jesuh Khrih thawngin Kawlramchungah pakhatnak dirhmun siter hi kaa tim. Cu cu keimah nih cun ka tuah kho hrim hrim lo nain Jesuh khrih thawngin a si kholomi thil zeihmanh a um lo tiah Dr.Sasa nih achim. Pathian nih hibantuk minungĀ  Chinmi chungah akan thlah piak hi cu a sunglawi tuk hringhran. Pathian nih Dr. Sasa achunmang hi tlinter hram seh.

Author: admin