Kum 2000 in Bawipa nih Langhnak Pek A Rak Ka Thawng Cang i, A Lih Bal Lo

SALTANG CHIN MIPHUN CAAH LUATNAK. Chin miphun cu, kawl miphun he kan i fonh tlawmpal in an tangah, chuak kho ti loin nihin tiang saltang kan si. Ramthumnak a kalmi nih lih țawn chomin, refugee kan hmu tiah an i ruah. A ngaite ti ahcun, kan lung a cawt tuk caah lih chimah kan i ruah tu a si. Kan chimmi nak tam deuh le faak deuhin khuachia minung hna nihin, an rak kan tuahto i a kan tlaihhrem taktak! Kan lung a cawt caah le a chim zia kan rak pemh lo caah a si.

Pumpak men tlaihhreem siloin, kan miphun ningpi in tlaihhreem kan si i, kanram an kan chuh i kan nawlngaihnak vialte an kan chuh dih. kanram cu anmah ram a si i kan miphun cu an ke tangah an chiah i dolh dih ding kha an i tinh.

Miphun pakhat in dir kho lo ding kha an i tinh caah, a si khawh chungin an kan tlaihhreem i, Ca cawnnak leiin siseh, chawleh chawhrawlnak leiin siseh, lam le sul leiin siseh, pehtlainak leiin siseh, nunphung lei in siseh, bawi țuannak leiin siseh, a lam kipin, an rak kan kham ( Sanctions). Ramthumnak kan rak lanh khawh hlan kha zeitluk indah kan rak har kha! 2002 kum, Malaysia in ka kir ka hmanhah kan rak har tuk rih. Kan ke in khual kan rak tlawng i lakphak dinnak hmanh kan rak ngei huaha lo.

Sihmanhselaw, Velngei PATHIAN nih, Abraham nupi cu Faro nih a chuh tikah, Abraham cu a rak bomh bantukin, ramțha lanh khawhnak innka a kan hun piak i, ramthumnak hna kan phak khawh hi a si. Lihchim in ramthumnak kan phak si loin, BAWIPA vel thawngin a phan khomi kan si.

Hi kong ahhin, PATHIAN Hmai ah satan he taza i cuai ka ngamh. Satan nih, “lih in pei ramthumnak nan phak ko cu,” hei ti selaw, “na mi hna nih an kan tuahto ning zat hmanh an chimthiam leh lo kha” rak ngai kaan chimh lai ka ti lai i pakhat hnu pakhat ka chim hnga! Satan nih, anmah hrimhrim nih pei lih kan chim an ti ko cu,” ka ti selaw, “an lungpei na cawtter hna cu, “BAWIPA, an lung hun var ter hna hmanh, cun hun chim țhan hna seh,” tiah, BAWIPA cu ka nawl lai i, ka chim bantuk khin an chim ve cang lai.

Chin miphun nihhin, nihin tiang hrimhrim in luatnak kan hmu bal rih lo. Miphun huap Thluachuah zong kan hmu bal rih lo. Pumpak in cun thluachuah hmu an um ko. Mifir, ziknawh eithawng, uktu țhalo hna kut tang ah saltang kan si peng ko rih. Saltang ti cu, dantat tinak a si. Cucaah, Chin miphun cu kum 70 renglo ralhrang hna sal taannak dantatnak kan rak ing tinak a si.

Vawleicung ah, Chin miphun kan um thok kain, Chin miphun huapin siseh, a ram huapin siseh Thluachuah a hmu bal rih lomi le ralhrang hna sal kum 70 reng lo a tang cangmi miphun kan si. Cucu a za cang ti hngal loin, PATHIAN biaphuangtu cheukhat hna nih dantat rih ding phunin an chim lengmang tikah, zeibantuk dantatnak dah an duh ti?

BAWIPA an PATHIAN hi ngol hngal loin dantat hmang PATHIAN dara a si? Rai in kan thih lengluang le ral kutin kan khua le inn an duahmi lengluang le an kan thahmi le an kan hrawhmi lengluang pin ahhin, zei PATHIAN dantatnak dah an duh rih?

Israel mi hna kum 70 sal an tan hnuah, ‘sal nan tan lioah PATHIAN nawl nan ngaih lo caah, dantatnak chap nan si lai’, ti a um ti lo. Sal an tan ruang le harsatnak an in ruangah an i thlen khawh hlei lo caah, BAWIPA nih, “Sual ka phaw lengmang hna lai lo, a zungzal in an cungah ka thin zong a hung lai lo. Ka damter hna lai, ka bawmh hna lai, ti thiang kan theh hna lai i kan thianter hna lai, lungthin thar kan pek hna lai, thlarau thar kan pek hna lai.

Lung bantuk a hak mi nan lung ka lak lai i tisa bantuk a nemmi lung kan pek hna lai. Ka THLARAU cu nan chungah ka khumh lai i ka nawlbia le ka phunglam zulin nan nung lai,” a ti ( Isai 57:16-19; Eze 36:25-27). Cun, “taksa Thluachuah zong kan pek hna lai,” a ti (Eze 36:29-30).

Ezra, Nehemiah hna nihcun an sualnak le an miphun sualnak kha an rak phuan tikah, BAWIPA PATHIAN nih a rak cohlan piak hna. Cucaah an ram sersiam rian țuan kha an hma a kal. Kha hna kha Tlangbawi te hna le profet te hna le PATHIAN a țihmi an si hna.

Ezra le Nehemiah le Moses bantukin kan miphun sualnak kan phuan i BAWIPA kan nawl awk caan a si. Amosa 7:1-6 bantukin, BAWIPA kan nawk awk caan a si. Kannih Chin miphun hna zong hi Israel mi hna bantuk in, BAWIPA kan PATHIAN nih, caan sau sal kan rak taannak chungin luatter awkah le kan hmuh bal rih lomi miphun huap le ram huap Thluachuah co ter awk kha a kan tinhpiak.

Cucu a phuangtu ah le a tlamtlin khawhnak hnga a Lamkaltu ah a thlahmi a sal pakhat ka si. 2008 phunghrampi khi BAWIPA țhawnnak thawngin remh/hloh a si te lai tiah 2010 hrawng khan ka rak chim cang i faak piin “a si kho lai lo,” tiah, an rak ka al i Dr. Ngun Cung Lian zong nih, “ka nun chungah an remh kho lai ka zum lo a rak ti i, “rak zoh, BAWIPA țhawnnak thawngin remh/hlonh a si lai,” tiah, Gmail chanah khan ka rak challenge!

Miphun kongah, Kum 2000 kum thar zanthok in BAWIPA nih langhnak pek a rak ka thok cang. BAWIPA cu a lih bal lo. Kum 2020 hin kan luatnak kum a tlin cang caah, luat kho kan si cang. Kum 2020 January ah, BAWIPA nih a ka pekmi Jer 29:11, “Nan ca i ka tinhmi cu keimah lawng lawng nih ka hngal, tiah BAWIPA nih a ti. Cucu vanchiatnak si loin hmailei ruahchannak le thluachuahnak caah a si lai,” ti le Hosea 6:3

BAWIPA hngalh cu i zuam u sih, khua a dei hrimhrim lai bantukin, kan sinah a ra hrimhrim lai. Vawlei a hnawntertu țhal ruah a sur hrimhrim lai bantukin kan sinah a ra hrimhrim lai,” ti hi. Kum 2020 le 2021 ah, rai le ral in kum hnih harsatnak khuamui kan kal cang. A kum thumnak ahhin, theitlai zeimaw cu kan hmuh cang lai tiah ka tuak. BAWIPA cu a lih bal lo, a ka thlahtu nih tlinter awkah a ruah cangmi cu a let lai lo.

Miphun caah a țuantu hna nih, BAWIPA țihzah bu le ding fel tein kan țuan paoh ahcun, tuanah teinak luatnak kan hmuh ko lai. Thlacamtu hna zong nih nan tha thlah hlah u law, khuachia nih kan luat a duh lo caah, mi a tukforh peng ve ti philh hna hlah usih.‘Zeitin, THLARAU nih misual lung aa thlen hi ka hngal lo,’ ti le ‘Zeitin khamh hmuhnak zumhnak a ka pek ka hngalh lo,’ ti le, ‘Mi lungthin chungah khan, Rulhreu a hrolh ca, thihnak le rawhnak nihkhan a uk cang.

Sihmanhseh dawtnak in na tongh hna ahcun, a rawk cia lung kha a nung țhan ko lai,’ a ti bang, BAWIPA Vel nih a kan thlen le zumhnak a kan pek le a kan tongh kha kan hmuh lai. Amen. BAWIPA Vel cu nan cungah um ko seh. KHRIH Lamkaltu Tluang Lian (Martar)

Author: admin