Ni Hin Ah Mipi Sinah Nawlngaihnak An Pek Than Ahcun  Thaizing Ah CDM Pawl Rian Kan Lut Dih Lai

Atu hi Kawlram ah Covid Third Wave kan ton cuahmah lio pi a si. Ralhrangbu nih rampi nawlngaihnak a lak caah sii lei riantuanmi tampi cu CDM ah an lut.

Atu lio kan boruak le kan tonmi zoh ah ralhrangbu nih mipi sinah nawlngaihnak a pek than a si ahcun CDM a lut mi Sii lei riantuan tu vialte nih kan rian ah kan lut than lai tiah Sergeon Bo-kyi Min Maung Maung nih a chim.

Sergeon pakhat a si ve mi Bo-kyi Min Maung Maung hi No. 14 sii tat-yin siibawi pakhat a si i, ralhrangbu nih nawlngaihnak a lak hnuah spring revolution ah a lut ve mi a si.Atu covid dirhmun zoh ah ralhrangbu le a tanhtu hna nih CDM a lut mi sii riantuan pawl sual an phawt mi hi zeitin hmanh cohlang awk a tha lo. Ralhrangbu nih nihin ah mipi sinah nawlngaihnak a pek ahcun thaizing ah rian ah kan lut than dih lai.

Atu siibawi pawl zoh ah Kawlram mipi nuai 56 he tahchun ahcun mi tlawmte kan si. CDM a lut mi mahtluk kan tam mi ruah ahcun zeitin hmanh ruah ah a si kho lo. Ralhrangbu nih uknak an lak caah mipi nih ngandamnak lei ah an tuar taktak. Atu Covid-19 third wave doh hi Kawlram ca ahcun thinphan a um ngaingai tiah a chim.July 7 tiangah Kawlram ah Covid-19 zawtnak an hmuh mi 175923 an um. A thipi 3570 an si. July 7 nikhat chungah zawtnak hmuh mi 3570 an si i, minung 57 an thi tiin ralhrangbu ngandamnak lei riantuannak nih a thanh. source; Khit thit Media

Author: Main Editor

Leave a Reply

Your email address will not be published. Required fields are marked *