Nihin Zinglei Lihninh ruang ah Biakinn a Rawk

Nihin November 26 zinglei sml. 6:15 hrawng ah a cangmi lihninhnak ruang ah Hakha he meng 50 hrawng a hlatnak Lungcawi khua i Believer Church biakinn ah rawhralnak a um, tiah Khrihfabu pastor sin in thawngpang kan theih.

Lungcawi Believer Church ah pastor a ttuahmi Saya Van nih, Li aa hninh ning a fak hringhran. Kan khua thing inn pawl cu an i thui dih ko. Sau deuh i hnin sehlaw zeidik kan lawh hnga, tiah lihninh a fah ningcang The Chin Jouarnal ah a chim.Lihninhnak ruang ah Believer Church biakinn pulpit cunglei tlakrawh a cim i pulpit zawn ah a vung tla. Pulpit cung i tlakrawh rualmi a cim i celling a pemh hnu ah pulpit zawn ah a tla. Thudan cheukhat le thilri cheukhat an rawk, tiah a chim.

Hakha khuami hna zong nih lihninhnak fak ngaiin an theih ve. Nihin zinglei lihninh cu a vawr bak in a kan vawr ko. Inn a rawkmi zong an um kho men. Aa hninh ning a fak tuk, tiah Hakha khuasa pakhat nih a chim ve. Lihninhnak kong he pehtlai in Myanmar khuati zung nih Hakha he meng 10 a hlatnak Nitlak-Chaklei zawn ah 6.0 Magnitude lihninhnak zinglei sml. 6:15 ah a chuak, tiah report a chuah ve.US Geological Survey zong nih Hakha pawng ah 6.1 Magnitude lihninhnak a chuak, tiah a langhter ve. Tuzing Suimilam 6 Minutes 15 le 42 Seconds (Myanmar Times) ah khan Hakha in Meng-10 hlaatnak le Thantlang in Meng-6 hrawng hlaat nak Khuafo khuapawngin aa thawkmi Lii fak ngaiin a hngin na’in Minutes tlawmpal te lawng a hnin ca’ah chiatnak le hlohnak fakpi tuarnak a um loh ti’ah theih asi.

Hi Lii hngin hi Hakha, Thantlang, Falam, Tedim, Tonzang, Kalemyot, Gangaw lei pinah kan Mizoram Aizawl, Champhai, Lunglei, Lawngtlai le Saiha pinah Myondwa, Mandalay le India ram Calcutta tiangin an theih tiah an chim. Kawl Myanmar Molewatah, Nyphidaw nih cun 6.0 Magnitudes asi i, Leitang 46 KM (Depths) in a thawk ti’ah an chim na’in India Methodology Surveys nih cun 5.8 Richter Scale asi ati ve.Mah hi Satellite(ဂြိုဟ်တု) in an hmuhning a dang cio i,US Geological Survey nih cun 5.8 Richter Scale, Leitang 42.1 Kilometers in Epicentre in asi ati lioah German Research Center for Geo- Sciences( Dr. Vum Son rak tuan belnak) nih cun 6.1 Richter Scale asi ti’ah a chim ve. Zeipoh siseh law atutiang cu thihnak le fakpi in chiat nak a um timi theih ding a um rih loh. Acheu nih cun vawihnih hngin ding a um rih an ti nain tihphan ding cu a um tuk rua loh. Thlacamnak he i bawm cio hna u sih.

Author: admin

Leave a Reply

Your email address will not be published. Required fields are marked *