Phunzai Lo Tein BAWIPA sinah Lawmhbia Chim Hi Ral Teinak Asi

LAWMHBIA CHIM HI TUANTE TEINAK A SI- Kan inn le kan lo le kan biakinn hna an kangh cuahmah i kan thin a pawh cuahmah lio ahhin, phunzai lo te le mah le mah i mawhchiat loin, van leitu zoh u sih law, kan i ruahchanmi zohchihin BAWIPA sinah lawmhbia tuhi chim ko hna u sih. Cucu tuante i teinak hmuhnak țhabik le kan hriamțha bik, BAWIPA bomhnak kan hmuh khawhnak ding cu a si lai.

Israel mi hna Kanaan ram an phak a tlaitertu bik cu an phunzaitamnak kha a si. Cucaah, Bible nih “Zei bantuk thil nan ton hmanh ah lunglawm in um u,” (1Thes 5:18) a ti bantukin, mah le mah i mawhchiat le facebook chung i phunzainak cathlah, coment tamte hna hi i suum u sih. BAWIPA sinah Job bantuk in lawmhbiatu chim hna usih.

Kan inn le lo a kangh i kan biakinn hna a kangh hnu ahhin, Vel ngei, BAWIPA PATHIAN zaangfahnak pei kan hmuh țhan ve te lai cu! Ziah, BAWIPA hna tlak loin khuachia nih kan cungah zeidah an tuah khawh? Cun, BAWIPA nih a kan ven pi lo ahcun zei khua ram dah kan ven khawh lai? Ral ruangah siseh, kanmah hrimhrim BAWIPA sin i kan palh ve ruangah siseh, kan inn le lo le biakinn hna cu kaang ko hna hmanh selaw, Velngei BAWIPA PATHIAN zaangfahnak pei kan hmuh țhan hna lai cu?

Kan inn le lo le kan biakinn hna an kangh hlannak in Thluachuah kan hmuh deuh te lai i, Vel ngei PATHIAN Zaangfahnak zong kan hmuh deuh te lai. Cutik ahcun, kan inn le lo a kangh i kan biakinn hna a kangh ruang i kan lungfahnak le ngaihchiatnak hna nihhin, nunțha deuh le lungput țha deuh a kan hmuhter zong kan i fiang te lai. Khua țha deuh le inn le lo țha deuh zong kan ngei țhan hna lai.

Biakinn hna an tuk i inn le lo hna an tuk i, facang hna an tuk i, a sual lomi mipi le kum tlinglo ngakțha tete hna an nun buin mei an khangh hna le an tlaihmi hna an nun buin an sa an canmi te hna ruang ahhin pei, Jer 51:11 le Juda 1:6 bantukin tuanah phuhlam an si ve lai cu. BAWIPA tuah i hriim tawn u law, nan lungtu țhawnter chinchin ko u.
KHRIH sal Tluang Lian (Martar)

Author: admin