Pu Daniel Sakhong le Rev.Thlaawr Bia Hi Tha Tein Cuaithlai Tti Aherh Cang

Daniel Sakhong- A peng, A tlang, A khua cio in CDF kan um hi a ttha. Kan miphun ralkap CDF member kan tam deuh nak lam, ramleng in phaisa a chuah deuh nak lam pauh hi kan miphun caah thazang a si i, kan ral tei nak ah hriamttha an si.

Rev.Thlaawr Bawihrin_ Dr.Thlaawr Bawihrin nih achimmi athat ning hi amak ko. Atimi cu: Ramleng um mi nih nan unau le kha Delhi ah rak u tiah nan cah hna. Cu cu Delhi CRC he tonnak kan ngeih ah fiang tein an kan chimh caah hibantuk hin ahohmanh ruahnak icheu ti hlah uh. Mizoram khua thilman le inn man vialte nan hrawh dih. Inn hlan man 500 zong kha 1000 rak pe ko u tiah nan chungkhar nan unau le nan rak ti hna.

Midang nih inn hlan ding in inn ngeitu he 500 in hnatlaknak an tuah cang mi kha, midang pakhat nih 1000 in kanmah rak kan um ter tiah an ti hna. Cu zong cu ramleng ummi nih 1000 in kan in pek hna lai tiah rak ti u tiin nan ti hna. Cu lawng asi lo, ramleng ummi thiam thiam nih ramchung CDF lungput nan hrawh hna. Ramleng ummi nih phaisa pengtlang ah phaisa tampi nan kuat hna.

Cubantuk pengtlang I CDF riantuantu hna nih uniform aman fawimi an duh ti lo. Pengtlang cheukhat sifak deuh nih uniform man fakmi an I caw kho ve ti lo. Cubantuk ruangah lungfah le lungdongh in CDF kirtak in mi tampi cu mah le khua ah an kir cang hna. Mah vialte hna hi ramleng ummi nih nan kan hrawh tiah an ti. Cun, CDF A tu kan dirhmun ah ralhrang tuknak in CDF chung rualremnak rian ah caan kan dih deuh cang tiah CNA upa nih an kan chimh tiah Rev.Dr.Bawihrin Thlaawr nih a chim.

Thingkung ahram in bongh ding ah cun, ange lawng thlongh khi zeihmanh santlaihnak a ngei lo. Ralhrang tei khawhnak dingah mah le pengtlang te lawng kilven hi santlaihnak a um lo, a hrampi khi kan ven a hau. Uniform man fakfak, taisawm atlei in tleu mi, namte atleu in tleumi I hruk ko nain raltuknak ah kal ding ti vialah ka lu afak e, ka paw a fak e ti lengmang cu ngaihchia tuk nan si. Mah le pengtlang ven a hau lo, Chinram ven ding asi. Kan ral doh hmasa loin, kanmah peng le tlang heh tiah I sik, I entai hi ningzak asi tiah Rev.Thlaawr Bawihrin nih a chim.

Author: admin