Ralhrang bu nih rian a khinhmi/a khanhmi hna cu

Ralhrang bu nih rian a khinhmi/a khanhmi Bago ramṭhen Chief Minister (CM) U Myo Swe Win, Mandalay ramṭhen CM U Maung Ko, Karen ramkulh CM Saw Myint Oo le Kachin ramkulh CM U Khet Hting Nang hna cu Dec 10 ah dantat phihkharnak tuahmi cazin ah a khumh hna tiah theih a si.

Cu pin ah Rangoon khuapi Shwedagon pura lam kam ah a ummi runvennak thilri serchuahnak hotu zung, ralhrang hlathlainak hotu zung le Naypyidaw i ralkap hlun hna bu zong US nih dantatnak a tuahchih fawn hna. Vawleicung ramkip in nuhrin covo a buartu pumpak 15 le a bu 10 hna cu US nih dantat phihkharnak kan tuah hna tiah Dec 10 ah US Department of Treasury tang a ummi Office of Foreign Assets Control (OFAC) nih nih a thanh.

U Myo Swe Win cu April 9 i Bago khuapi ah minung 82 renglo thahnawn an tonnak Bago ramṭhen Chief Minister a si. Runvennak thilri serchuahnak hotu zung cu Myanmar mipi hna ruru hranghrang in thahnak ah ralhrang nih an hmanmi hriamnam a sertu a si. Cun ralhrang hlathlainak zung cu nawlngeihnak lak hnu ah ralhrang nih mipi thahnak ah an hmanmi hriamnam phunphun, kuan le thildang tampi a bawmtu a si. Cun ralkap hlun hna bu zong ralhrang hotu hna hruainak in dirhmi a si. Cucaah hi a cunglei kan langhter mi hna hi dantatnak kan tuah nak a si tiah OFAC nih an cathanh ah an langhter .

Britain Cozah zong nih Myanmar mipi hna cungah sualnak le ṭhatlonak phunphun pehzulh in a tuahtu ralhrang bu dantat phihkharnak thar kan tuah tiah Dec 10 ah an thanh ve. Britain cozah nih dantat phihkharnak a tuahmi hna cu ralhrang bu kuttang ummi ralhrang hlathlainak zung, runvennak thilri serchuahnak zung, raldohnak hriamnam cawk-zuarnak zung le ralkap hlun hna bu an si tiah RFA nih a ṭial. Credit;The Chin Post

Thawngpang dang….Sagaing ramthen Monyua khua Tamatan(တမာတန်း) mei tung pawngah nihin December 10, zinglei ah puahkehnak a chuah caah mipi leiin minung 1 a thi i pakhat nih fakngai in hliamhma tuar tiah khuami hna nih an chim.

” Zinglei suimilam 10:00 hrawng ah meitung pawng ah puahkehnak a chuak, a thawng a thang taktak. Cycle in a kalmi pa pahnih cu ahliamh hna, pakhat cu a hmun ah a thi colh i pakhat cu a hliamhma a fak ngai, mizaw phor motor in an kalpi hna, meithal puah thawng zong kan theih cun khuachung ah pa pakhat zong tlaih a tong” tiah khuami pakhat nih a chim.

Nihin December 10, global human rights ni ah ramchung silent strike tuahmi ah Monywa khuachung motor lampi cu an kiang i, dawr hna zong khar an si lio ah a tu bantuk in puahkehnak achuak tiah khua mi hna nih cun an chim.Credit; The Chin Post

Author: admin