Rev.Dr.Za Thio: Hnangamtertu Kan Ngei

Hnangamtertu Kan Ngei ( Sam 23:4) ” Asi ko, thihnak thladem i a horkuang chungah kal hmanh ning law thil tha lo kha ka tih lai lo. Zeicahtiah nangmah nih na ka umpi; na tanbo le na thiangthunh nih ka hna an ka ngamter.” Nizan ka tialmi kha thihnak a tongmi hna lei kap in ka tialmi asi. Sam 23:4 nih hin mahnak kau a huap.

Athimi lawng si lo in thihnak ruangah a ngaih a chia tuk i a lung a kuaimi hna kan ca zong asi chih. Cupinah Palestine ram i tuu hna an umnak le, an lam le an sul tih a nun zia zong khi a hei telh chih. An tlonnak le an lam hi a zei- maw caan ahcun horcehrep le chengpa- lang le lungpi karlak i a kalmi lam te hna an si. Rilh sual le tlak sual ahcun i hliam cu chim hlah thih zong thih khawh asi.

Cucu thihnak thladem le horkuang timi ah ai tel ve. Cubantuk lakah tlongleng hna hmanh- seh tuu nih a khaltu hna tukhal an hmuh paoh ahcun an hna a ngam tuk. Aruang cu a khaltu hna nih kenmi an ngei. Cucu tanbo (rod) le thiangthunh ( staff) an si. Tuu cu zohkhenh hau le ven peng hau an si. An ral anmahte va doh dingah hriamnam an ngei lo. Sihmanhsehlaw tukhal nih an kenmi tanbo le thiangthunh an hmuh ahcun an hna a ngam ko.

Tanbo hi pee thum hrawng an sau i a rit ngaite. Mah tanbo in David nih chiandeih le vom kha a thah tawn hna ( 1 Sam 17). An thiangthunh hi pe riat an sau. A parlei ai kuai. Lam in an tlak i chengpalang i an tlak tikah siseh, rawl an tam pah i an rilh sual zongah siseh, hlingbur lak i an i taap sual zongah siseh, mah thiangthunh cun an hei kawih hna i an chanh hna. Hika dir- hmunte hi i fiang tuk buin David nih Bawipa zohkhenhnak hi a hlawi i, ” Na thiangthunh le
na tanbo nih ka hna an ka ngamter ” atinak asi.

Sam 23 hi thlarau pale a cheu nih cun, “Sam cauk i nightingle vate,” an ti. Nightingle cu kawfi zawng muisam a ngeimi va fate asi. Apa hi zantim muipadap lakah hla asa tawn. A aw hi a tha taktak. Cuve bang, Sam 23 nih thih tian ruang i zuun ngai i a tapmi le tuarnak fak ruang i a temtuarmi hna kha a hnemh ve hna. Bawipa bia cu kap hnih har vainam ban tuk asi tak ko, Heb 4:12. Tukhal.nih an i kenmi thiangthunh le tanbo can an si tak ko.

Vawikhat ah minu a fapa dawt cu raldohnak ah a thi. Cu thawng a theih le cangka inn khanah a lut i ai erh. Innka zong a hrenh. Ngaihchiat le lungfah tuar in caan a hmang. Pastorpa nih a va leeng i a kam in a thut hnawh. Asinain minu nih a chawn duh lo. Holh lo in caan tlawmpal a um hnu ah ai lak zau i Sam 23 kha a van rel. Caang thumnak a rel dih i caang linak a van phanh khin minu nih a van zawnh ve. ” ……Nangmah nih na ka umpi. Na tanbo le na thiangthunh nih ka hna an ka ngamter,” an van ti vial cun a hmur ah mirh thlam a hung cuang i , ” Atu cu phundangpi in ka hmuh thiam cang,” tiah ati.

Ngaihchiatnak le lungrawhnak, thinhunnak le aipuannak in kan khat maw? Atulio kan dirhmun cu raichia lak le ralhrang lakah kan um lio asi i thihnak thladem lakah kan i ciah lio asi hi mu. Cucaah Sam 23 hi rel le lek usih. Kan ngaihchiat bu le kan vansan bu in ,” Na tanbo le na thiangthunh nih ka hna an ka ngamter,” tiah chimphuang hna usih. HNANGAMTERTU KAN NGEI KO. Jehovah kan Pathian nih thlua kan chuah piak ko seh. Na siaherhmi SHARE ve hna.

Author: admin