Tanintharrii ramthen, Pulaw peng ah CDM a tuah mi U Thar Win, Ma Saung Myiat Aung le Ma Chu Thiri Naing hna cu

Tanintharrii ramthen, Pulaw peng ah CDM a tuah mi U Thar Win, Ma Saung Myiat Aung le Ma Chu Thiri Naing hna cu tuzing ah ralhrang nih motor in an pah hna i an nunnak a liam tiah theih a si. Hi ralhrang motor a mawng tu cu U Than Shein a si, a nih hi USDP member pakhat a si bantuk in ralhrang lei a dir mi a si tiin khuami nih an chim.

CDM a tuah mi U Tar Win kum 57 cu Phu Shan hna hi tili lei in a rak kir lei ah motor in pah hna hi asi. U Tar Win an pah hlan ah lamkam ah a dir i bia a ruah mi nu 4 cu a pah hmasa hna i nu pahnih cu a hmun ah an nunak a liam, a dang nu pahnih cu hma an pu.

U Tar Win cu siizung an kalpi nain lam ah a nunnak a liam i a ruak cu Puh Law siizung ah a um tiah khuami nih an chim. U Tarwin le nu 2 a pahthat tu he aa pehtlai mi poh fak piin lenrluh kan cham hna lai tiin Puh Law PDF nih cathanh an chuah. Credit; The Chin Post

Thawngpang dang….Mi zapi vengtu ralkap phu hna nih bomb puahhnawh in doh an ton caah ralhrang phu lei tilawng pakhat cu nihin December 13, zinglei ah Kani peng Medin khuapawng Chindwin tiva chung ah a pil tiah Kani mi zapi vengtu ralkap KPDF1 sin in theih a si.

”Medin khuapawng lei ah ti chung pil hram aa thok, a dihlak in pil dawh a si ko. A tu ah ralhrang tilawng a pil mi hi lung hring a phormi tulawng hna chung in pakhat a si, a tu ah kahdohnak a chuak rih, thil sining taktak chim khawh a si dih lo” tiah KPDF1 in rianngei tu Ko Gyi nih a chim.

Nizaan December 12, Kani peng Chindwin tiva thlanglei ah ralhrang phu hna lunghring a phortu tilawng a si lai tiah ruahmi tilawng 11 cu KPDF1, PDF, DRPA, M&K The Boys le hmunhma vengtu phu hna nih bomb lung 20 leng he puahhnawh in an doh hna tiah theih a si. Cu dohnak ah cun ralhrang phu lei in minung 20 hrawng a thimi an si lai tiah DRPA nih cathanh a chuah. Crd; The Chin Post

Author: admin