Walat peng ah ralhrang phu cu PDF nih bomb an puahhnawh hna caah sakhan-hmu telh in

Sagaing ramthen, Shwebo pengkomh Walat peng Shingmaka lamtonnak pawngah ralhrang phu cu Taw-gyi-muai-hauh (တောကြီးမြွေဟောက်) phu Shingmaka (ရှိမ်းမကား PDF) nih nihin December 15, zinglei suimilam 7:20 ah bomb lung 6 he an doh hna caah Tit Theink (သစ်သိမ့်) sakhan-hmu telhin ralhrang minung 4 an thi, kut kee bul tiang in hliamhma tuar zong an tam tiah Shingmaka(ရှိမ်းမကား) mi zapi vengtu phu sin in theih a si.

” Taw-gyi-muai-hauh (တောကြီးမြွေဟောက်) phu nih pa-de-ta (ပဒေသာ) bomb lung 6 an puahhnawh hna,Tit Theink (သစ်သိမ့်) sakhan-hmu telhin ralhrang minung 4 an thi. An hliamtuar ning a fak ngai cheukhat cu an tai tiang a cat i kut bul mi le kee bulmi an tam, an motor cu a hlonh in aa hlonh caah a thi lo mi zong an hliamtuar ning a faktuk” tiah Shingmaka (ရှိမ်းမကား) PDF nih cathanh an chuah. Khit Thit Media(Crd ; The Chin  Post)

Thawngpang dang………….Sagaing ramthen, Pinlebu peng chung December 14 kahdohnak ah ralhraang 20 hrawng an thih lai kan zumh tiah Pinlebu Revolution PR nih an chim. “Kawlin-Pinlebu kar Taungmahgyi lam i ralhraang motor pawl cu Pinlebu PDF nih hriamnam ngan in an kah hna hi a si. Ralhraang motor pakhat a kaang i a cung cuang mi ralhraang 20 cu an thih kan zumh. Fianghlang in cun kan chim kho lo. Kanmah PDF le him te in hnu kan kir than” tiah an chim.

Kaya ramkulh (Karenni) ah ralhraang battalion LIB-531 in Sergeant pakhat cu hriamnam tling he KNDF sin ah aa fon tiah KNDF sin in kan theih. Cu ralhraang battalion in Sergeant pa nih cun, “Hramhram uknak ka duh lo ca ah mizapi lei ah raltha tein ka dir lai ti in biachahnak ka tuah i ralhraang kut tang riantuannak chung in mizapi sin ah ka kirnak a si,” tiah a chim ti in KNDF nih an thanh.

Sagaing ramthen, Ayadaw peng, Kebar khua cu december 13 zing in Council ralhraang pawl nih luhhnawh in an hrawh, an khangh ca ah inn 100 leng a ciam tiah tualchung mi nih Yangon Khit Thit Media ah an chim. Cu Kebar khua cu ralhraang le Pyo Saw Htee pawl nih hriamnaam ngan le hriamnaam hme in an kah i an luhhnawh hna ti a si. Ralhraang pawl an chuah in khuami an rak kir than tik ah inn 100 leng a rak ciam tiah tualchung mi nih an chim.

“Ralhraang pawl nih khuami eidin an ei an hrawh, cun khua an khangh ca ah inn 100 leng a kaang. Khuami le PDF hna nih inn a kaang mi an phalh lio a si. Khuami nih an sungh mi cu tam tuk man a si” tiah tualchung mi pakhat nih a chim. Credit; The Hakha Post

Author: admin