Cheuhra Cheukhat Ape Lomi Cu Damiah Khrihfa Pastor Nan Si

Cheuhra Cheukhat ape lomicu Pathian chaw a firmi Damiah an si.Damiah Khrihfa- Pastor- Evangelist kan um.An fir pinah an hei doh chinchap rih….Mal 3:8… IsraelR.Thang

Biak Lian Thawng- Khrih Lungput: Mi Fapa hmanh hi, rianțuanpiakmi si awkah ka rat țung lo, midang rianțuanpiaktu si awk le mi tampi tlanhnak ding ca i ka nunnak pek awkah pei ka rat cu a ti (Marka 10:45).
Christmas hi mi vialte caah a si. Mi a cheu, zumlotu nih cun Christmas tham cu Khrihfa mi caah pei a si ko cu an ti. Kha kha a si lo, Jesuh Khrih a ratnak, Christmas cu mi vialte caah a si.

Hlaphuahtu pakhat nih cun, “Vancung Siangpahrang nih sunparnak a kaltak i vawleicung mi vialte caah a ra,” a ti. Bawi Jesih nih van sunparnak kha a kaltak i vawleicung misualmi vialte khamh awkah Bethlehem ah nautatnak in a chuak i minung tuanbia ah a hung lut. Jesuh Khrih cu Pathian sinak kha a ngei ko, nain cu Pathian sinak kaltak in vawlei misual khamh awkah a ratnak hi Jesuh lungput a sannak bik cu a si. Pathian tluk sinak a ngei ko, nain sal sinak tu kha ai thim i nawlngaihnak lam kha a zulh i, toidornak in vailamcung thihnak tiang kha a in.

Cucaah Paul nih Filipi Khrihfabu sinah a chimmi cu, “Nan lungputning cu Khrih nih a rak ngeihmi lungput kha siseh,” tiah a ti hna (Filipi 2:1-11). Khrih lungput ngeih ahcun porhlawtnak vialte an tlau dih i keimah ka fim bik, ka thiam bik, ka hngal bik, keimah thawngin a si timi lungput nih hmunhma an ngei kho ti lo. Mah țhatnak lawng i hmuh i midang țhatnak hmuh thiam lo te hna kha an lo dih.

Jesuh cu Bawi a si. Jesuh Khrih nih hi lungput a ngeih ruangah, “Vancung a ummi vialte nih si hna seh, vawlei i a ummi vialte nih si hna seh, vawlei tang i a ummi vialte nih Jesuh cu Bawi a si (Filipi 2:10-11) an ti lai. Jesuh lungputning zoh tikah midang ca țuan duhnak lungput kha kan hmuh.Phun dang cun Jesuh cu midang caah a nung i midang nih nunnak kan ngeih khawh nakhnga a nunnak zong a pek sian.

Cucaah Jesuh nih, “Kei cu nunnak kha an ngeih i duhdim tein an nun khawh nakhnga caah ka ra,” tiah a ti (Johan 10:10). A chim țhan rihmi cu, “Mi Fapa hmanh hi rianțuanpiakmi si awkah ka rat țung lo, midang rianțuanpiaktu si awk le mi tampi tlanhnak ding ca i ka nunnak pek awkah pei ka rat cu,” tiah a ti (Marka 10:45). Cucaah Jesuh cu midang caah nunnak pek kha a rat hnawhchan cu a si. Midang nih țuanpiak dingah si loin midang ca rianțuan dingah a nunnak pekin hi vawlei ah a ratnak a si.

Pathian nih minung cungah a tuahmi vialte hi dawtnak le zawnruahnak ruangah a si. A Fapa ngeihchun Jesuh Khrih vawlei i a hun thlahnak zong hi misual a kan dawt ruang le kan zawn a kan ruah ruangah a si ko (Johan 3:16). Kannih Khrihfa, zumtu a simi hna zong nih kan minung hawi cungah zawnruahnak, dawtnak le siaherhnak kan ngeih lo ahcun zumtu țha, zumtu tak kan si kho lo. Dawtnak a um lo ahcun thin hna a tawi khun i rian kan țuannak zongah tlabulbal in khuasak a fawi te.

Cucaah Paul nih dawtnak a biapitnak kong kha Korin cakuat chungah hitihin a țial, “Dawtnak cu thlachiat a ruat i mi cungah zaangfahnak a ngei. A nah a chuak lo, a lung a puam lo i aa porhlaw lo. Tlabulbal in khua a sa lo i amah zawn lawng aa ruat lo, a thin a tawi lo, palhnak kha aa cinken peng lo. Midang sualnak cungah khan diriam in a um lo, biatak tu ah khan aa lawm. Dawtnak cu a lung a sau i a thin a fual,” (1Korin 13:4-7) tiah a ti.

Dawtnak cu a ngan tuk hringhran. Kalvary vailam cungah Bawi Jesuh kan ca i a thih ngamnak zong hi dawtnak ruangah a si. Dawtmi hna caah cun zeipaoh hi ngamh a si ko. Bawi Jesuh nih a kan dawt tuk ruangah vailam cungah a nunnak a pek. Cucaah Jesuh nih, “Pakhat le pakhat i daw u. Keimah nih kan dawt hna bantuk hin pakhat le pakhat nan i dawt awk a si,” (Johan 13:34) tiah a ti. Cuccah cun Khrihfa, zumtu a simi vialte nih Khrih lungput, dawtnak lungput kan ngeih cio ding kha kan Bawipa nih a kan cawnpiakmi cu a si. Bawipa nih thluachuahnak kan pekpiak ko seh. Amen.

Author: admin