Dr.Van Ram Uk: BAWIPA nih Aung San Chungkhar An Ci Ahmih Hna Lai (VIDEO)

Dr.Vanramuk –

Kanmah nih cun Aung San Suu Kyi hi athangcho lai tiah kan ruah, nemmam, a thangcho lai lo. Zeitintiah Bawipa nih aduh lo, Bawipa nih an ci ka hmih lai ati. Suu Kyi cu nawlngeihnak a vun lak bakah a tuah hmasabik mi cu apa Aung San milem pi a ser colh, phaisa aser colh, amh sunparnak akawlmi poh cu Bawipa nih a hloh hna lai. Suu Kyi hi a chuak lai i, ram a ser lai nan ti, nemmam Bible ning asi lo, Suu Kyi hi a thangcho nemmam lai lo tiah a chim. Zoh uh, Bawipa nih vutcam ah a hlonh te lai tiah achim.

Rev.Za Thio: Josef Nun Cawng Hna Usih– Math 1:24 = Josef cu aa hngilhnak in a van i hlau i a mangah vanmi nih a fial bang in a tuah i, Mary cu nupi ah a thit. Math 2:14 = Cun a tho i ngakchia le a nu cu zaan ah a lak hna i Izipt lei ahcun a zaampi hna. Khrismas ah vawi tampi phung ka chim cang i Josef kong hi tlangtar in ka chim bal lo tiah ka ruah. Cun midang zong nih tlangtar ciammam i an chim ka thei bal fawn lo. Abiapi lo ah kan rel sual ahcun kan palh tuk lai. Josef le Khrismas cu ai then kho lo. Nihin cu Josef nun cawn kan sawm ko hna hih.

Josef min pu hi Baibal ah pa hra reng lo an um. Apa khatnak cu Jacob le Rachel fa, u le zuar a tong i a netnakah Iziptram wanci- chouh tiang a phanmi asi. Cun Jesuh ruak a vuitu zong kha Arithmathia khuami Josef asi khah. Cupinah Lamkaltu cauk i Paul a va sawmtu Barnabas a min hmasa zong hi Josef arak si ve. Adang cu lanhtak ko hna ning. Nihin i a nawl cawng usih ka timi Josef cu Jesuh apa tiah an timi Mary vapa Josef asi lai. Tawite in kan van zoh hna lai.

Josef ti a sullam cu ‘ Pathian nih a chap’ ti asi. Min tha ngai asi. Josef le Mary cu Nazareth khuami an si i, i thium ding in ai ham cangmi an si. Puai tuah lawng a tang cang. Annih lio i an i ham hnu ahcunn nu nih tlangval dang an i duh le lung in cheh i thah khawh asi. Mary nih Pathian thawnnak hmang in Thlarau in nau a pawi tikah thuh awk a tha lo. Kanmah cio bang an khuami zong minung an si ve caah thalak in Mary kong kha an ceih lai i an vahpi ko lai.

Josef zong nih a theih lawng si lo in a hmuh ko lai dah. Kha tikah Josef cu miding le mitha asi caah lung i chehter
nemmam cu, ningzahter a siang lo i daiten then a timh. Sihmanhseh law Pathian nih vancungmi a thlah i – Mary nau a pawimi hi Thiang Thlarau thawng in asi ti le fapa a hrin lai i a min ah Jesuh na sak lai ti le ami kha an sualnak chung in a khamh hna lai ti a chimh tikah a lung ai thleng i Mary cu a nupi ah a thit, Math 1:25. Josef kha atu chan liberal pawl bang Pathian bia a duhlomi rak si seh law Mary kha a thi naisai lai lo, ningzak in a tuah lai.

Biaknak dang cu um rih hna seh atu chan tiang Jesuh hi Josef le Mary an ih tinak in pawi i a chuakmi asi ko atimi Khrihfa ai timi chungah an um. Josef nihcun Pathian bia cu a zumh i a pom ko. Josef bang Jesuh cu Thiang Thlarau in pawi i hrinmi asi hrim- hrim ti zum in aupi hna usih. Tanh usih. Milu rel ding in mah le chuahnak khua cio hlam le kal a herh tikah Mary kha nau ngei ding asi ti a hngalh ko. Lampi ah kan har tuk lai ti a ruat lo. Amah he Mary he naute he min khumh kan hau ati i a pawhpi hna.

Messiah cu Bethlehem khuaah a chuak lai timi chim chung bia a tlinnak lai Josef kha Pathian nih a hman. Bethlehem an cam chungah Jesuh cu a chuak taktak. Tukhal nih an va zoh lio zongah Josef zong Mary le naute sinah an va hmuh chih. A pa dirhmun bak ah a dir ko. Ka thisa asi lo ti in ai zukphiak lo. Kannih zong Jesuh a zummi kan hawile hi kan zahpi hna ding asi lo, kan dirpi hna le kan tanpi hna a hau ve. Khrih le a mi hna he pumkhat kan si.

Vanmi thiam nih Josef kha, ” Tho law ngakchia le a nu kha Iziptram ah zaampi hna,” ati tik zongah biatamh loten a tho i a zaampi ko hna, Math 2:13,14. Bawipa caah ralzam dirhmun dir zong a ngamh tuk. Kannih zong a herh ahcun Bawipa ruangah kan umnak khua le ram zong chuahtak ngam ding asi ko. Khuapi in khuate ah zaam a herh zong le Khrih ruang asi ahcun kan Amen a hau ko.

Herod a thih hnu ah Josef mangah vanmi nih, ” Tho, ngakchia le a nu k a la hna law Israelram ah kalpi hna,” ati than. Iziptramah kan miphun tampi an um ko, a nuamh zong a nuam deuh, Jesuh kum 30 tlin hlan cu um ko rih usih ati lo, a tho cawlh i a kalpi ko hna. Cun an khua asimi Nazareth ah um hmun a khuarpi hna, Math 2:19-23.
Josef cu mah nuamhnak a kawlmi asi lo, Pathian fial ning paoh in a um kal i khua a
sami asi. Lot bang Pathian fialmi kongah ai hnuaihnai phun zong asi lo.

Mah bantuk mi hna hi Bawipa nih a kawl i hmuh a duhmi hna cu an si. Cucaah kannih zong caan tlawmpalte vawlei i kan nun lio ah hin kanmah duhmi nak in Pathian duhmi a duh i ai thimmi si hna usih. Josef nun hi cawng hna usih. Kan duh ahcun Bawipa Thiang Thlarau nih ara laimi kum thar kan luh hlan te ah le kan luh hnu zongah lam a kan hruai ko lai. Amen!!

Author: admin