Jesuh Khrih Hi Nithum le Zanthum ah Thanchung in Atho Lo

JESUH CU THLAN CHUNGAH NI THUM LE ZAN THUM AUM LO. THLAN AH NI HNIH AUM I, A NI THUMNAK NI AH A THOȚHAN (Asau tuk lem lo..rel khawh rak i zuam ko. Abiapi ngaimi asi)

Thawhțhannak he pehtlaiin Jesuh cu a thi i Thlan ah nithum le zanthum aum hnu ah a thoțhan timi Bible khoika hmanh ah aum lo. A Nithum nakah a thoțhan ti lawng aum. Thawhțhannak he aa pehtlailo mi (Matthew 12:40) Jonah hmelchunhnak khi mi tampi nih an i palh i, Jesuh cu nithum le zanthum thlan ah aum tiah an i ruahpalh mi asi. Matt 12:40 hrilhfiah zong ka tial chih lai caah a sau deuh zong asi le rel khawh rak i zuam te. (Nithum le Zanthum kong cu Matt 12:40 te lawngah aum mi asi. Bible dsngah aum lo)

(1) Jesuh cu a nithum nak ni (on the third day) ah a thothan.- 1Cor 15:4 “cun Cathiang chung țhiamțhiam ah a țial rih bantukin, an vui i NI THUMNAK NI ah thawhter a si. (Act 14:40, Luk 24:7, Matt 16:21, Josea 6:2) Jesuh hi thlan chungah nithum le zanthum rak um sehlaw A nili nak ah a thoțhan ding khi asi. Nithum le zanthum (Tling tein) aum ahcun Bible nih A nithum nak ni ah a thothan timi khi lih asi hnga.

Jesuh cu Thla ah nithum le Zanthum rak um sehlaw THURSDAY ah a thih a hau hnga i, Ani li nak (Sunday)ah a thothan ding khi asi. On The Third Day (A Ni Thumnak) nih a sawh duhmi cu Ni Hnih hnu ah Nithumnak tinak asi. Friday ah Jesuh athi i, Saturday ah a thi rih, ni hnih asi cang. A Ni Thumnak Sunday ah a thothan.

Ka Langhter duhmi cu Bible nih “A Ni Thumnak” ah a tho atimi hi Ni Hnih hnu ah a tho tinak asi. Nithum le Zanthum thlan ah na um ter ahcun A Ni Thumnak ah a tho rih lo tinak asi hnga. A Ni Li nak a tho na ti hrimhrim ahau. Bible nih ni thumnak ah a tho ati ko caah Jesuh cu Thlan ah Ni Hnih aum hrimhrim tinak khi asi ko.

(2) Matt 12:40 JONAH HMELCHUNHNAK- “For as Jonas was three days and three nights in the whale’s belly; so shall the Son of man be three days and three nights in the heart of the earth” (Ngapi chungah Jonah cu ni thum le zan thum a um bantuk khan Mi Fapa zong cu vawlei chungah ni thum le zan thum a um ve lai) Lai Bible nih a biapi tukmi biafang a nganh caah Mirang Bible ka van thilnak asi.

Mirang Bible nih cun “Jonah cu Ngapi Pawpi chungah (The belly of the Whale) ati i, Lai Bible nih Ngapi chungah ati. “PAWPI” a nganh. Ngapi Pawpi chungah nithum le zanthum aum. Mirang Bible nih Mi Fapa (Jesuh) cu “VAWLEI LUNG” (The Heart of The Earth) ati i, Lai Bible nihcun Vawlei chungah ati. “LUNG (Heart) a nganh. Jonah in the Belly of The Whale. Jesus in the Heart of the Earth.

(3) THE HEART OF THE EARTH.(Mt 12:40)- The Heart of The Earth cu THLAN tinak asi lo. The Heart of the Earth cu Laiholh in Vawlei-Lung tiah hei ti rih ko hna usih. Hebrew siseh Mirang le Greek siseh “HEART” hi a muru, a LAIFANG (Center) tinak ah hman tawnmi asi. Ezekiel 27:25-27 ah khin ” The Heart of the Sea” tiah kan hmuh. Rili Laifang tinak asi. Kawl Bible nih “ပင်လယ်အလယ်” ati i a duhnak a khen kho ngai. The Center of The Sea he a sullam aa khat.

Cucaahcun “The Heart of The Earth” nih a chim duhmi cu “The Center of the Earth” (VAWLEI LAIFANG) tinak asi. Matt 12: 40 nih a chimmi cu “Jesuh cu Vawlei Laifang (The center of the earth) ah nithum le zanthum aum tinak asi. (Zohar 2: 266) nih cun kan ” Vawlei Laifang” ah aum mi cu JERUSALEM asi tiah a ti. Mifim pawl zong nih asi ko tiah an țhohkhan dih ve. Cucaahcun Matt 12:40 ” Mi Fapa cu Jerusalem ah nithum le zanthum aum te lai tinak asi.

(4) JONAH HMELCHUNHNAK (SIGN) CU THAWHTHANNAK KONG SILOIN HARNAK (MUIHNAK) ASI (Matt 12:38-40). Pharasi hna nih Jesuh cu “Hmelchunhnak”( Sign) rak kan hmuhsak tuah tiah anti. Lai Bible nihcun “Khuaruahharnak” ati i a sullam aa dang deuh ngai. Hmelchunhnak (Sign) hi a dik mi asi. Kawl နမိတ်လက္ခဏာ ati i a dik tuk.

JONAH Hmelchunhnak cu zeidah asi? Jonah cu ngapi pawpi chungah nithum le zanthum aum. Nithum le Zanthum chung HARNAK le MUIHNAK chungah aum mi kha Jesuh nih a chimmi asi. Jonah thawhthannak kong a chim lo. Jonah hrimhrim zong a thi lo caah Ngapi nih a luak thanmi kha Thawhthannak he aa pehpar lomi asi.

Ngapi nih a luak mi kha THAWHTHANNAK caah hmelchunhnak rak sisehlaw Apostle pawl zong nih an i chirhchan hnga. Jesuh nih Mi Fapa zong Jonah bantukin Nithum le zanthum chung HARNAK le MUINAK chungah aum lai tinak asi. Jesuh nih thawhthannak kong a chim bak lo hih. Cucaahcun Matt 12:40 hi Thawhthannak he aa pehpar mi asi lo ti kha i fiang cikcek a hau.

(5) NGAPI PAWPI CU THLAN TINAK ASI LO. CUN “VAWLEI LAIFANG” (The Heart of the Earth)ZONG THLAN TINAK ASI LO- Ka hrilhfiah cang bantukin “The Heart of the Earth” cu THLAN tinak asi lo. JERUSALEM asi.Jesuh nih a chim duhmi cu “Jonah cu ngapi paw chungah nithum le Zanthum chung HARNAK le MUIHNAK chungah aum bantukin Kei zong JERUSALEM ah Nithum le Zanthum chung HARNAK le MUIHNAK (Thihnak) chungah ka um ve te lai ti khi asi.

Jesuh cu Thursday (Cacawn nili) an tlaih. An serhset, an tuk an velh. Harnak (Suffering) tuar hram aa thok. Friday (Cacawn ninga) ah a thi i Saturday (Zarhte ni) tiang thihnak chungah aum. Matt 12: 40 ah nithum le zanthum chung atimi hi an tlaih zan in a thawhthan ni tiang khi a chim duhmi asi.

(6) KA CAAN A PHAN CAAN- Jesuh hi vawlei cungah kum 33 hrawng aum. A chim lengmang mi cu “Ka Caan a phan rih lo” a ti (Jh 2:4,7:6; 7:30). Harnak a tuarnak ding a chim chung (Mk7:31). Zeidah Jesuh nih a cihm CAAN hi asi hnga? A tawinak in chim ahcun Jesuh an tlaih ni in a thih chung nithum le zanthum khi Ka CAAN ati mi asi. An tlaih zanah Jesuh nih A CAAN CU A PHAN cang ati(Matt 26:45, Mk 14:41. aJh 17:1)

Jesuh vawlei cungah a rat hnawh cem A CAAN cu Nithum le Zanthum chung Jerusalem ah Harnak le thihnak (Muihnak) tuar kha asi. Jesuh hi kum thum chung thawngtha a chim ah Jerusalem a kal bal lo. A caan a phak lo caah a kal lo bia asi. Jerusalem a kal tik cu Harnak le thihnak tuar awk ah kal ding khi asi. An tlaih lai zarh lawngah Jerusalem ah a kal. Zarkhat chungah Jerusalem cu voiithum a phan . riak lo in Betheny ah a kir thawn. Avoithum nak (Thursday) ah an tlaih. A caan a phan cang caah asi. Jerusalem ah Harnak le thihnak tuar ding a kal,
Cucu Matt 12:40 nih a chim duhmi asi.

(6) MATT 12:40 A CHIMMI TAKTAK- Jesuh cu THLAN ah Ni thum le Zanthum chung aum lai tinak siloin Vawlei Laifang Jerusalem ah Jonah bantukin Harnak le Muihnak chungah nithum le zanthum chung aum lai tinak kong asi
(A) Sabbath ni ah Jesuh a thothan tiah a zummi nih Jesuh cu WEdNESSDAY (Cacawn Nithum ni) ah a thi tiah an in cawnpiak hna lai. Zeicaah ti ahcun “Jesuh thlan chungah nithum ke zanthum (Theory) in an tuak caah asi. Matt 12:40 an i theih palh caah asi.

(C) Sunday ah Jesuh a tho ko tiah a zum ko nain Nithum le Zanthum theory a zummi pawl nih cun Jesuh cu THURSDAY (Cacawn ni li ni) a thi tiah an in cawn piak ve hna lai. Laimi Dr. pawl zongah an tampi caah GOOD FRIDAY siloin GOOD THURSDAY an ti. An theih lo bia asi.

DONHGHNAK- Jesuh cu a thih in a Ni Thumnak ah a thothan. Cucu Bible nih voi tamtuk a kan chimh mi asi.
Nithumnak timicu Ni hnih hnu lawngah nithumnak asi. Nithum chung Thlan ah rak um sehlaw NI LI NAK ah a thoțhan ding khi asi hnga. Jesuh cu Friday ah a thi i, A ni thumnak ni Sunday ah a thothan. Hihi biatak asi.

NAWLNAK- Chirhchan (Ref) ka lakmi Cauk atam tuk i Compile ka tishmi asi caah Credit ka pe hna lo.
Pathian nih hngalhnak kan pe ko seh. Cawnpiak ah nikhat chung lak ding subject asinain a tawi khawh chungin tialmi asi caah a a fiang huaha lomi zong nan um kho men

Author: admin