Kan Pi Suu Kyi cu Kum 80 Atlin Tiang Thongthlak Ding Asi Cang

Rampi ruahnak petu Daw Aung San Suh Kyi cu hramhram nawlngeihnak latu ralhrang nih kum 4 thong tla ding in nihin January 10 ah nawl an chuah than, tiah biaceihtu pawngkam um mi hna nih an chim. Ralhrang nih Daw Aung San Suh Kyi cu ramchung ramleng thil i a luhchuaknak kong taza an cuainak ah sual an phawt i, kum 2 thong tla ding in dan an tat. Cun, Chawnhbiaknak thilri le ramdang he an i pehtlaihnak kong sual an phawt than i, kum 1 thong tla ding in nawl an chuah than. Cu sualpawtnak pahnih fonh in kumhnih thong tla ding in ralhrang nih dan an tat.

Cu pinah Covid kong ah phungphai a buar, tiah sual an phawt than i, kum 2 dang thong tla ding in dan an tat than. Nihin January 10 ah sualphawtnak pathum ca ah, a zapi fonh in kum 4 thong tla ding in dantatnak an pek. Ralhrang phu nih sual an phawt phunthum ca ah kum 4 thong tla ding in nawlpeknak an chuah ṭhan hi a si. Ralhrang nih thawng an thanh ning ah cun kumhnih kan ṭhumhpiak, tiah an thanh. Daw Aung San Suh Kyi cu kum 6 thong tla ding in nawl an rak chuah tinak a si.

Ralhrang hna nih hriamnam i bochan in February 1 ah hramhram in uknak an rak laak. Ramchung hmunkip ah mipi hna cu an thah hna, mei in an kangh hna, nu hna cu an tlaihhrem hna, mipi thilri hramhram in an chuh, an firpiak hna, kumtling lo ngakchia an thah hna, mizapi cu phungning loin an tlaih hna i thong an thlak hna, cu bantuk tuahsernak tel in mipi hremnak phunphun cu faak tuk in an tuahnak kong, ramchung ramleng um mi ralhrang an cawlcanghnak a ngiathlaitu hna nih an chim. Khit Thit Media, TCP

Author: admin