Lung Afak Kho Tuk SAC Ralkap Senthum Hnin Lian Piang Nih CDF Sin Aum Hnu In Chinram Chung Ralhrang Anthil Tuah Mi Aphuan Dih

Anih hi 2008 ah Ralkap rian ah alut I Falam ah ranksang ngai in rian arak tuan tu asi, cun Ralhrang nih nawl ngeihnak an lak hnu in Hakha I SAC ralkap bawizik BrigGen. Myo Htut Hlaing zungah case tlaitu asi i a chung thil tampi a hngalh tu asi. SAC nih dothlennak a tuahtu le mipi hi zawnruahnak ngei loin hriamnam ngan le Chemical buh mi hriam in duhpaoh in an kah hna. Keimah hrim nih ka hmuhmi asi. SAC ralkap pawl hi ramdang tapung/ralhrang lungput an ngei, ti hi vawleipi nih thei seh ti ka duh ati.

Khrihfa hruaitu pawl hi mipi rialditnak caah an hman hna: SAC nih biaknak hruaitu (Khrihfabu hruaitu) pawl an ton hna i mipi rialditnak caah an hman hna. Biaknak hi ramkhel caah an hman. Hihi an kan nehsawh asi ti hi vawleipi nih thei hna seh ti ka duh. Cozah rianṭuan pawl meithal an tlaihter hna; CDM tuah loin zung a kaimi cozah rianṭuan pawl hi meithal tonghtham ning an chimh hna i meithal an pek hna.

Cutin mipi hi ralkap caah an hman hna, ati. Uknak an lak hnu hrim cun SAC ralkap bawi pawl nih an kuttang ralkap an kan neek tuk. Fialmi tuah, pekmi ei, bia kan let hlah ti phungthluk an i ngeih, cun Ralkap training lio hrim hrim hin hiban tuk hi an kan cawn piak cang i cu phung cu ralkap tu u nih an caah ralkap tampi nih kan tuar kho lo i kan zaamnak zong hi asi, ati.

SAC ralkap pawl zaam kho lo dingin an kan tuah; Hakha, Falam, Tedim tbk SAC ralkap chungtel Chinmi pawl cu ‘kan zaam lai lo. timi biakamnak catlap ah minsen an kan thut ter. Hakha SAC ralkap 3 an i that cang; Atu lio cu chun he zaan he suimilaam 24 chung rianṭuan asi caah ralkap pawl an thaba tuk. Khatlei in an chungkhar an sifak fawn. Thabat le lungretheih celh lo lungdongh in Hakha um SAC ralkap 3 tiang anmah tein an i that cang, ati.

SAC ralkap nih hin Hakha ah Ralhrang duhlo nak alanghter tucu nifa tin ti awk in an tlaih ko hna, cu chung I an tuahmi vialte lakah ka celh lo bikmi cu, Hakha ah an tlaih hna nih thi lak an velh hna, A thi cangmi an ruak cu glucose an rawnh i motor in Kalay ah an kuat. Kalay ah sibawi pawl ruak an hlai ter hna hnu ah ruak cu an khangh.

Sibawi pawl nih an duh lo nain an tlerh hna i lih hrokhrawl in zawtnak ruangah an thi tiin an thihnak aruang an tuahter hna. Hi bantuk an thil tuahmi ka hmuh tikah anmah sin rianṭuannak thazaang ka ngei kho ti lo, tiah Hin Lian Piang nih a chim. Kan chungkhar tlaih, hrem, thah piak dingin an kan tlerh.Atu zong hi ka chungkhar an tlaih cang hna Chungkhar cu kan caah a biapi bik an si bantukin ralkap tampi nih cun mah bantuk an hmuh/theih tikah zaam an ngamh ti lo. Cun, ralkap tam deuh cu lenglei mi he an i pehtlaih khawh lo caah zeitin dah kan zaam lai i ho dah kan pehtlaih lai timi an hngal lo, ati. biakilh:Zalen page chung i Video in achim mi chung in tawi nak in leh mi asi.

Author: Main Editor

Leave a Reply

Your email address will not be published. Required fields are marked *