Magway ramthen, Myine peng Kyawngkan (ကြောင်ကန်) khua ah mi zapi cycle hna cu

Magway ramthen, Myine peng Kyawngkan (ကြောင်ကန်) khua ah mi zapi cycle hna cu December 12, zaanlei suimilam 3:00 hrawngah ralhrang phu hna nih meikhangh in an hrawh tiah khuami nih an chim. Khuachung mi nih an ngeihmi kee thum ngei cycle(သုံးဘီး) 1 le cycle 8 cu ralhrang phu hna nih an lak i an kalpi khualeng ah meikhangh in an hrawh tiah khuami pakhat nih cun a chim.

”Kee thum ngei cycle (သုံးဘီး) 1 le motor cycle 6 cu khualeng ah an kalpi hnu ah meikhangh in an hrawh dih, khuachung ummi mino hna nih an tih caah an zaam dih, cu a zaam mi hna chung cun Kyawngkan (ကြောင်ကန်) khua lawng si lo in an pawnghrawng ummi khuami cheukhat hna zong an zaam, an zaamnak ah khua a sihtuk cang caah harsatnak an tong” tiah khuami pakhat nih cun a chim chap.

Myanmar ram chungah Covid zawtnak le ralhrang phu hna nih hramhram nawlngeihnak an lak ruangah a lamkip in harsatnak le tumchuknak ton a si, a luancia kum 10 chungah democracy ngah in thanchonak a rak ummi hna zong duhsah in tumchuk lei a panh than, 2005 kum hlanah raktonmi sifah harsatnak lamchung ah phanhthan bantuk a si tiah UNDP nih cathanh a chuah.

Thawngpang dang…..Kan Hnu zarh, Zarhte ni ah khan US ah thlichia a hran ruangah rawhralnak nganpi a chuak i minung 80 leng an thi cang, an umnak hngalh khawh loin minung zeimawzat an um i, mithi hi an karh theo te lai tiah zumh a si. Thlichia hi Arkansas, Illinois, Kentucky, Missouri, Mississipi le Tennessee hna ah a hrang i, kokek rawhralnak faakpi a chuahter, tiah theih a si.

Kentucky State lawng ah hin thlichia hrang nih minung 70 leng nunnak a laak cang. Kentucky Governor Andy Beshear nih cun thlichia hi hmunkip ah a hran ruangah zei tluk in dah rawhralnak a chuahter hgnalh khawh a si rih lo kong le mithi hi a karh lei an panh lai a zumh kong a chim. Governor nih hin Kentucky State pumpi ah State of Emergency a phuan colh.

Illinois state thlanglei, Edwardsville khua ah cun thlichia hrang nih hin Amazon warehouse a hrawh, Warehouse chung ah hin minung 100 hrawng riantuan mi an um tiah theih a si i, riantuan mi 45 cu him tein an chuak cang. Sinain a tang rih mi zeimawzat cu laachuak ding in bawmhchanhnak tuah cuahmah lio a si. Thlichia hrannak hmun i bawmhchanhnak tuah ding in National Guard hna zong fial an si cang.

President Joe Biden nih cun an ram nih thlichia hran an tuar mi hna lak ah a faak bik mi pakhat a si kong a chim i, mimung nunnak zeizat a liam le zeitluk in dah rawhralnak a canter timi thawng fiang an theih rih lo kong a chim. Thlichia hrannak hmun hna zong tlawn aa timhnak kong President Biden nih hin a chim. Credit The Chin Post

Author: admin