Mizoram MP Pu K. Vanlalvena (Rajya Sabha MP) nih nizan December 14, khuasik caan Parliament biaceihnak ah

Mizoram MP Pu K. Vanlalvena (Rajya Sabha MP) nih nizan December 14, khuasik caan Parliament biaceihnak ah Mizoram ralzam kong a chim. Pu K. Vanlalvena nih cun Mizoram hmunkip ah ralzam 15,000 hrawng an um cang kong a chim.

“Myanmar ralkap nih tukum February thla thawk in nawlngeihnak an laak caah an ram mi tampi cu Mizoram ah an rak zaam hna. Ralzam hi Mizoram hmunkip ah an i thek hna i, ralzam 15,000 hrawng an um cang. A cheukhat cu an chungkhat sin ah an um, cheukhat inn an hlang, cheukhat Mizoram cozah le mibu sak mi camp ah an um. Central cozah bawmhnak tel lo in Mizoram cozah, biaknak bu, NGO le mi pumpak bawmhnak in thla 11 an um cang, an herhhai mi pohpoh pek an si leng ah ngakchia sianginn kainak tiang in tuaktan piak an si,” tiah a chim. Credit; The Chin Post

Thawngpang dang……….Myanmar ram nikhat chungah Covid-19 mizaw thar minung 250 le zawtnak aa chawnhmi minung 527,274 an um tiah ralhrang phu kuttang riantuan ngandamnak lei vuanci zung nih December 14 ,zaan ah cathanh a chuah.

Checknak an tuahmi hna cu ralhrang uk duhlo in CDM cawlcanghnak a tuahmi sizung, laboratory hna telhlo in ralhrang kuttang um ralhrang sizung ah tamdeuh cu checkhlat a si caah zawtnak chawnhning hi zeitluk in a karhkha chimkhawh a si rih lo. Ngandamnak lei vuanci zung nih a thanh ning ah cun a luancia suimilam 24 chung 16155 cu checkhlatnak an tuah i zawtnak hmuhthar mi minung 250 an hmuh caah zawtnak hmuhthar mi hi zatuak in 2.25% an si.

Covid-19 zawtnak in adam than i sizung in a tumnak nawl a ngei cangmi hi minung 357 an si tiah theih a si. Cun Covid zawtnak a chawnh i nunnak a liammi minung 5 he zawtnak ruangah nunnak liammi dihlak hi 19188 an si cang. Myanmar ram cu Asian ram hna chung in Covid-19 zawtnak runvensii chunh hmasa bik ram a si na in,a tutiang ah Asian ram 10 chung in runvennak sii aa chunmi a tlawmbik zatuak a si tiah Vaccine Tracker cazin ning ah hmuh a si.

Vawlei rampi Covid zawtnak phundang simi Omicron zawtnak aa chawnh cangmi hi China, Hawngkong, Japan, South Korea, Thai, Singapore, Malaysia, India, Thirih Lingka, Nipaw, Mawldaith hna telh in ram 76 ah cu zawtnak cu hmuh a si cang tiah theih a si.

Author: admin