Nihin zinglei ah ralhrang pawl CDF- Kanpalet nih an kah than hna

Kahdohnak Kong Thawngthanhnak. Nihin December 9, zinglei suimilam 9:00 hrawngah Saw peng le Kanpalat peng, Pawngchawng(ပေါင်ချောင်း) leiah rallam a sialtu ralhrang phu hna le CDF- Kanpalat kar Pakun(ပါကွန်း) khuapawng ah kahdohnak a chuak. Kaphnihkar kahdohnak cu suimilam 3 hrawngtiang an rau i ralhrang phu lei in minung 7 an thi, minung 6 nih hliamhma an tuar.

Ralhrang phu hna nih hriamhme le hriamngan hmangin thazaang tamtuk an hman caah CDF-Kanpalat lei hliamtuar um lo in hnu an tolh than.A tu ah thazaang chap in a ummi ralhrang phu hna cu Kanpalat khua economic bank le pengkulh fimcawnnak zung ah umhmun an khuar tiah CDF-Kanpalat nih cathanh an chuah.Credit:The Chin Post

Thawngpang dang……Sagaing ramthen, Salinkyi Peng, Dungtaw khuami minung 11 cu December 7 zing suimilaam 8:00 hrawng ah ralhraang pawl nih an hnulei kuttem bu in, mei khangh in an thah hna tiah tualchung mi nih Yangon Khit Thit Media ah an chim.

“Ralhraang pawl hi zing suimilaam 8:00 hrawng ah Shwetaungkung in an rak tum. Khua khat hnu khua khat in an lut i thilri an hrawh dih. Pintayah khualu ah khuami pakhat an thah. Khua dang lei kal an i tim i hlei cung an um lio ah bomb a puah caah ralhraang nih pawngkam khua pawl hriamngan in an kah. Dungtaw khua an luh hnawh hna.

Khuami 11 an tlaih hna, an hnulei ah an kut an tem hna i an nun bu in mei in an khangh hna. Dungtaw khua mi an si lai zumh a um bik. Khua in an chuak i Layngyin taung ah umhmun an khuar. Khuami an zaam dih cang” tiah tualchung mi pakhat nih Yangon Khit Thit Media ah a chim. Salinkyi peng i khuami pakhat zong nih, ralhraang pawl nih khuami minung 11 an nun bu in an hnulei kut tem he mei in an khangh hna i an aihram thawng ka theih nain ka bawm kho hna lo tiah Yangon Khit Thit Media ah chim.Credit;The Hakha Post

Author: admin