Ralhrang doh dingah ralhrang chung in achuak mi hna nih

Hramhram in nawlngeihnak a la i sualnak ngeilo mizapi cungah ṭhatlo nak phunzakip a tuahtu ralhrang bu in a chuak mi CDM ralbawi Major 48 hna hruainak in People Soldiers’ Defense Force (PSDF) dirh a si cang tiah Dec 12, tuni ah PSDF nih cathanh an chuah. PSDF cu ralhrang dohnak ah tualchung runvennak bu hna he i bawm in biatak tein cawlangh an i tim. PSDF ah ralhrang uknak duh lo in lamzawhtu mizapi hruaitu le bochan mi hna zong an i tel tiah theih a si.

PSDF hi November thla chungah khan tualchung runvennak bu a simi Chaung Oo, Myiang, Min Mu, Salingyi, Min Chian le Depeyin PDF hna pin ah Underground (UG) bu cheukhat hna zong ṭangṭi dingin hnatlaknak an ngei cang. Ref: People Voice Television (PVT)

Biatenh: Tutan dohthlen nak ah theihtlei tampi an um. Cu hna chugin pahnih khat vun char usih.
Kawl le tlangcungmi: Tutan dohthlen nak ah theihtlei taktak a si mi cu Myanmar tuanbia ah a um bal lo mi Kawl le tlangcungmi kan ṭanṭi mi hi a si. Cheukhat nih Kawl cu zumh ngam taktak an si lo an ti. Khatlei ah a hman nak a um ko. A ruang cu kum 60 renglo kan tuanbia ah Kawl hi tlangcungmi lakah zumh awk an tlak bal lo, an kan hlen, an kan nehsawh, an kan thlanglamh. Asinain tutan dohthlennak ah hin cun an lungthin tak tein tlangcungmi hna lei ah an ṭang ko tiah zumh cio a si. An mit a vaang cang: Kum 1962 in Min Aung Hlaing nih nawlngeihnak a lak ni Feb 1, 2021 tiang tlangcungmi hna kan temtuarnak,kansunghnak, ngaihchiatnak, lungfahnak le harsatnak hna kha Kawl nih an hmu kho taktak lo. Asinain tutan dohthlennak ah cun anmah nih a tak in an tuar tuk ve tikah kum tampi chung tlangcungmi hna kan tuarnak kha an i fiang, an mit a vaang cang.

An mi le sa hna nih an doh cang hna: Ralhrang hna sualnak le ṭhatlo nak cu mipi kan celh ti lo caah hriamtlaih in kan doh ve. Cu tiang cu theihtlei a si lem lo. Asinain an kuttang mi le sa hna nih an thiltuah mi an duh lo caah an chuahtak/hnu an chit hna i hriamtlaih in an doh ṭhan hna. Cucu Myanmar tuanbia ah cun theihtlei taktak a si. People Soldier’s Defense Force (PSDF) cu hi ralhrang doh dingah ralhrang chungin a chuakmi ralkap an si.Credit; The Chin Post

Author: admin