Sagaing ramthen, Myaung (မြောင်) peng December 14 ni ah ralhrang phu chungtel

Sagaing ramthen, Myaung (မြောင်) peng December 14 ni ah ralhrang phu chungtel minung 2 cu an nun bu in tlaih an si tiah Myaung (မြောင်) PDF nih an chim. Ralhrang phu chungtel Tat-kyat-gyi pakhat le tat-kyat pakhat an nun bu in tlaih an si, tlaih a tongmi ralhrang chungtel minung 2 cu mi zapi nih kan thah hna lai tiin an ra cio tiah Myaung (မြောင်) PDF he neihniam in ummi pakhat nih a chim.

Atu ah ralhrang tlaih in hren an sinak hmunhma ah khuachung mi hna nih kan thah lai tiah khuachung zapi ngawt in an rak chuak cio, a chuakmi cu an tam taktak a thong cu an tling kho men” tiah a chim chap. Myaung (မြောင်) pengchung ah Sagaing-Monywa motor lampi ah a kalmi ralhrang motor 3 cu December 14 ah bomb lung 8 he doh an ton caah ralhrang minung 20 nak tlawmlo an thi tiah mi zapi vengtu PAFD nih cathanh an chuah.

Sagaing chaklei Kani peng Chindwin tiva ah ralhrang hriamtlai phu hna nih zulhmi tilawng cu Kani mi zapi vengtu phu nih bomb puahhnawh in an doh hna caah ralhrang minung 10 an thi tiah cathanh an chuah. Crd; The Chin Post

Thawngpang dang…..Mon ramkulh chung i ralhrang tanhtu hna cu ral hmai ah kal dingin inn khat ah minung pakhat cazin nan pek hrimhrim lai tiah ralhrangbu nih an kan hnek tiin ralhrang he aa naihniammi hna nih an chim.

November zarhhnihnak ah khan mipi kilvengtu ralkap PDF he kahdohnak a fahnak hmunah kuat/kalter dingin Pyusawhtee, Pyituhsit le ralhrangbu tanhtu hna min cazin cu zarh hnih chungah chuahpi dingin ralhrangbu nih hramhram in nawl an chuah hi a si. 

Asinain atu tiang ral hmai ah kal dingin min cazin a pemi minung 10 lawng an si caah ralhrangbu nih anmah tanhtu hna chungin chungkhar pakhat ah minung pakhat min cazin pek dingin hrmahram in an hnek hna hi a si tiah ralhrang he aa naihniammi pakhat nih a chim.

Ralkap in pensen a la cangmi pakhat nih cun “Atu tiang ral hmai kal dingin cazin a pemi minung 10 hrawng lawng an si tikah ka theih tawk ah a bik in kanmah bantuk ralkap a tuan balmi hna kha cazin pek dingin an kan fial. Chungkhar pakhat ah minung pakhat tal i thawh dingin hramhram in an kan ti” tiah a chim.

Chungkhat pakhat ah minung pakhat i thawh dingin ralhrangbu nih a fialmi hna cu a bik in ralhrangbu pekmi thlahlawh, pensen le bawmhnak dangdang a hmumi chungkhar an si tiah theih a si.

Cu lawng si loin ralhrangbu nih cun ral hmai ah a kalmi hna cu ral an doh chung violate thlahlawh pek an si lai i ralram in an tlun/kir tikah inn-hmun le inn zong pek an si lai tiin an lemsoi hna. Asinain kahdohnak kip ah ralhrang hliamtuar le a thi an tam caah ral hmai kal dingin mi cazin aa pekmi an tlawm tuk tiah Than Lwin Times nih a tial. Credit; The Chin Post

Author: admin