Saya Van Tum: Thantlang Inn Kangh Lainak Ding Hi Ka MANG ah Ka Manh Hmasa Peng

Thantlang inn kangh ti bantuk pawl hi ka mang le ka taksa nih a rak theih hmaisa tawn. Nizan zanlei cu a zaw deng bantuk in ka um, ka lungrethei tuk, ka chung sivang, ka lung a nuam lo. Ziah thla mah ti hin ka um hnga ka ti. Thilthalo ngaimi pakhat khat poah cu a um te lai/a chuak te lai ka ti. Atu tiang ah inn a kaang cuahmah ko ti si. Atutan inn kangh zonghi zarhte zan ka mangah ka manh cang.

Atu lawng a si lo, voidang inn kangh kong zong ah siseh, ral an i doh tawnnak kong zongah siseh ka mang ah ka rak manh cia lengmang i ka taksa umtu ning zongnih a theih. Nan si cio ko lai. Kawl pawl zong nih mah bantuk phun hi an zumh ngai ve.

Tahchunhnak ah Kawl video kan rak zoh tawnmi ah minta pa cu misual pawl nih an vuak maw siloah accident a tong ti bantuk pawl ah mintami nu nih kheng a putmi siloah hrai ti bantuk kha a thlak sual i a kuai dih ti bantuk a um theu. An mang zong in an manh tawn/an theih tawn, an ton dingmi thilthalo pawl cu.

Tangkhawng 3 Diary: Kan Innte A Ciam CP Lian C. Kumthar lawmhnak kut i tlaihnak hmanh kan i tlengh hlan le kumthar a peh rih mi khuangtum aw a daih hlan, 2022 January 3 zanlei ah kan innte a ciam ve cang. Kan innte cu kan rianh dihka: 2021 July 14 in September 17 tiang, thlahnih lawng kan umnak manh mi, thilri zeihmanh lak le chuahpi lo tein a ciam.

A kaang te lai tiah kan ruahcia ko. Hawihnu ah a kangh mi nih inkhawhnak le tuar khawhnak hmanh a kan pek lehlam. Kan ram dohthlennak ah kan inn ai tel, ai pumpe, a kaang. Hawi nih an nunnak hmanh an pek! Bizu pali khat in kai chiah mi ka cauk, a bik in Lai cauk cheukhat le ka computer file vialte belte cawk than le hmuh tthan khawh a si ti lai lo, zeiti ttha.

Kan innte a ciamh ruangah Pathian sin le kan miphun dohthlennak ah ai tel mi dihlak cung ah vuivainak le lungsilonak kan nei lo. Pathian nih kan nunnak tu humzual ko seh. A zalen mi ramthar ah innthar kan sa tthan te lai.
Kan innlo a ciamhnak nih Pathian he kan i pehtlaihnak hrawk hram hlah seh. Pathian bochan in kan lungtthawng ko seh! Hnu kan kir lai lo, hmai kan nawr chin lai. “Pathian nih ka mitthli cu ka hmuhpiak seh law, ka thlacamnak cu ka theihpiak ko seh,” (Job 16:20). 2022 Tangkhawng 3, Cawnnikhat, Sangau. CP Lian C

Author: admin